Ministru Agrikultura no Peska (MAP), Joaquim José Gusmão dos Reis Martins hala'o enkontru ho diretor hotu MAP nian kona-ba ko'a osan MAP nian iha proposta OJE 2020 iha salaun enkontru MAP, Komoro, Kinta (21/11/2019). Imagén TATOLI/Antónia Gusmão.

DILI, 21 novembru 2019, (TATOLI) – Ministru Agrikultura no Peska, Joaquim José Gusmão dos Reis Martins, husu ba diresaun hotu iha Ministériu Agrikultura no Peska (MAP) atu kontribui hodi halo redusaun ba orsamentu ne’ebé Parlamentu Nasionál (PN) konsidera boot.

Ministru Joaquim husu ida ne’e relasiona ba konkordánsia Governu ho PN atu halo redusaun ba Orsamentu Jerál Estadu (OJE) 2020 ho montante biliaun $1,950 tanba ho montante boot maka PN preokupa, nune’e iha ona desizaun ida atu halo diminuisaun.

Relasiona ba redusaun MAP nian maka Ministru Joaquim konvoka reuniaun ho diretór hosi diresaun hotu atu halo ezersísiu ida atu koopera para bele ko’a osan ne’ebé hosi PN ho Governu halo atu redús.

“Diresaun sira hotu konkorda ou la konkorda mós tenke ko’a. Tanba ita tenke ajuda ita-nia Governu, importante maka korte sira ne’ebé maka halo labele implika fali ba iha atividade sira ne’ebé liga ho to’os-na’in, natar-na’in no hakiak-na’in sira”, hateten Joaquim José Gusmão dos Reis Martins ba TATOLI, iha MAP-Komoro, ohin.

Joaquim hatutan, planu sira seluk hanesan iha área administrativu bele rezolve. “Tanba ne’e maka osan sira ne’ebé tau iha planu prioridade no relasaun ho ita-nia povu ami la ko’a. Ko’a maka iha administrativu nian, sasán nian hanesan komputadór sira ne’e bele uza tuan sira ne’ebé sei iha no di’ak hela”, argumenta Joaquim.

Governante ne’e salienta, korte balu ne’ebé halo ba mós iha viajen estranjeiru no lokál tanba viajen lokál ne’e ba diresaun hotu, maibé atu halo konkordánsia hamutuk atu redús balu, tan ne’e tenke konkorda hotu.

Enkuantu viajen ba estranjeiru ne’ebé maka presiza tebes prezensa ministru nian no halo mós intervensaun ne’e konsidera importante, maibé bá partisipa de’it ne’e la nesesáriu atu bá.

“Viajen estranjeiru la’ós la importante, maibé tenta atu haree, ezemplu, viajen ministru bá para tuur de’it laiha intervensaun di’ak liu lalika bá no bele delega de’it ema seluk, más se halo intervensaun entaun bele partisipa hanesan enkontru sira ne’ebé ligasaun ho organizasaun boot sira ne’ebé MAP mós hanesan membru”, dehan Joaquim.

Ministru dehan, orsamentu ne’ebé mak aloka ba gabinete Ministru Agrikultura no Peska iha proposta OJE 2020 hamutuk rihun $100-resin.

Iha soru-mutu entre MAP ho Parlamentu Nasionál iha Komisaun D ne’ebé trata asuntu ekonomia no dezenvolvimentu foin lalais ne’e, deside hodi hamenus orsamentu MAP nian ba 2020 millaun $2-resin husi totál orsamentu hamutuk millaun $21,627.

“Osan ne’ebé ko’a la implika, iha balu implika más la ko’a iha atividade rutina ne’ebé mak la’o hanesan hasa’e produsaun ba hare, batar”, afirma ministru Joaquim iha Palásiu Governu, kuarta (20/11).

Governante ne’e salienta, orsamentu ne’ebé maka ko’a iha kapitál menór tanba planu atu sosa materiál sira hanesan komputadór no laptop, maibé tanba MAP hetan ona akordu ho parseiru dezenvolvimentu sira hodi apoia iha parte ne’e, nune’e deside redús tiha orsamentu ne’ebé aloka.

Diminui mós iha bens no serbisu hanesan iha viajen lokál no estranjeiru, iha kategoria transferénsia públika hanesan iha pekuária nian katak planeia atu sosa fahi, maibé tanba fahi ho moras agora, ne’ebé deside ko’a, nune’e mós ajuda grupu peska balu iha Ataúro.

Orsamentu MAP nian antes halo redusaun, iha kapitál menór hamutuk millaun $1,645, bens no serbisu millaun $12,761 no transferénsia públika rihun $214.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here