Prezidente interinu Autoridade RAEOA-ZEESM sesante, Arsénio Paixão Bano, bainhira partisipa iha seremónia pose Prezidente Autoridade, José Luís Guterres ‘Lugu’, iha Palásiu Governu, kuarta ne’e. Imajen/António Gonçalves

DILI, 21 novembru 2019 (TATOLI) –Prezidente Autoridade  Rejiaun Administrativa Espesiál Oe-Cusse Ambeno (RAEOA-sigla portugés) no Zona Ekonomia Espasiál Sosiál Merkadu (ZEESM), José Luis Guterres “Lugu”, ohin, informa, nia parte sei kontinua de’it buat ne’ebé mak lao ona iha Oecusse.

Notísia Relevante : Lugu Konsulta ho Entidade Hotu Molok Servisu

“Ha’u hanoin Oe-Cusse la’ós komesa agora, hahú tiha ona ho VI Governu no Prezidente RAEOA – ZEESM sesante, no ha’u ba atu halo kontinuidade de’it,” Lugu hateten ba jornalista sira, hafoin remata enkontru ho Ministru Justisa, Manuel Cárceres da Costa, iha edifísiu Ministériu Justisa, Caicoli, Dili.

Nia parte sei servisu hamutuk ho ekipa no lakohi atu personalize dezenvolvimentu Oe-Cusse katak nia parte mak halo ida ne’ebá no ida ne’e, maibé halo de’it obrigasaun hanesan sidadaun timor ne’ebé mak Governu fó konfiansa hodi hala’o servisu iha Oe-Cusse.

Nia dehan, prinsípiu mak buat ne’ebé mak di’ak koko atu halo di’ak liu tan, buat ne’ebé mak la di’ak tenta atu hadi’a, nune’e mak iha ona ekipa ida ne’ebé mak servisu hela kompostu hosi voluntáriu sira.

Nia dehan, presiza mantein obra sira ne’ebé mak hala’o ona iha Oe-Cusse, tanba orsamentu alokadu hosi povu nia osan, nune’e mak se-se mak ba iha Oe-Cusse tenke halo buat hot-hotu ho responsabilidade.

Vizita MJ

Oportunidade ne’e, Prezidente Autoridade RAEOA-ZEESM halo vizita kortezia ba Ministru Justisa, Manuel Cárceres atu bele hala’o servisu hamutuk di’ak liu tan iha Oe-Cusse.

Nia dehan, durante ne’e problema ne’ebé mak mosu iha Oe-Cusse mak disputa rai balun ema nian, RAEOA –ZEESM seidauk halo kompensasaun, balun halo tiha ona servisu maibé ema balun sei reklama. Tanba ne’e mak nu’udar Prezidente RAEAO – ZEESM ho seriedade no konsulta ba malu, autoridade sira, tanba atu halo dezenvolvimentu ba povu, nune’e atu la bele povu Oe-Cusse-oan sira ho laran moras.

Iha fatin hanesan, Ministru Justisa Manuel Cárceres, hateten, Prezidente RAEOA –ZEESM hala’o vizita kortezia ba iha Ministériu Justisa, bainhira simu posse iha semana liu ba, segundu mak servisu Ministériu Justisa iha Oe-Cusse, liuliu liga ba Terras no Propriedade, Rejista Notariadu no Defensoria Públika.

Ministru Manuel Cárceres haree katak Prezidente RAEOA -ZEESM disponivel tebes atu servisu hamutuk ho Ministériu Justisa atu haree kona ba asuntu rai, rejistu notariadu no defensoria publika.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here