Komandante PNTL komandu Munisípiu Lautem Superintendente Asistente Sebastião Alves Quintão.Imajen/Nelson de Sousa

LOSPALOS, 21 novembru 2019 (TATOLI)-Komandu  Polisia  Munisipiu  Lautem apresia tebes ho kolaborasaun autoridade suku, komunidade, juventude, veteranu no entidade hotu ne’ebé asegura situasaun seguransa  iha area jurizdisaun la’o iha hakmatek, pás no trankulidade.

Notísia Relevante :PNTL Lautem Presiza Tan Kazerna

Komandante PNTL Munisipiu Lautem, Superintendente Asistente Sebastião Alves Quintão  hatete, iha tinan 2019 hahú husi janeiru  to’o  mai ohin loron, laiha problema ka konflitu boot entre joven sira.

“Ha’u bele dehan situasaun seguransa ein-jerál la’o hakmatek tanba komandu PNTL Munisípiu Lautem la hala’o servisu mesak tanba iha kolaborasaun ida di’ak tebe-tebes entre komunidade, lider komunitáriu, juventude no parte hotu,” hateten Superintendente Asistente Sebastião Alves Quintão, iha salaun Administrasaun Manuisípiu Lautem iha Losaplos Vila, kuarta (20/11/2019).

Komandante PNTL  Lautem ne’e relata hosi  inísiu fulan janeiru to’o novembru, tinan ne’e, komandu Polisia Lauten rejista kazu hamutuk 100-resin.

Hosi  kazu sira ne’e  mai hosi tipu oioin, maibé ho númeru aas mak kazu asidente tráfiku, no tuir mai mak hadau malu rai, violénsia doméstika, abuzu sexual ho númeru ki’ik  no sira seluk tan.

Munisipiu Lauten iha Postu Administrativu  lima hanesan Iliomár, Lautem, Lospalos, Luro no Tutuala. Lautem mós iha suku 34  no aldeia 151.

Jeografikamente Munisipiu Lautem lokaliza iha ponta leste nian, ho nia luan 1,813.12 km (kuadradu) no nia populasaun hamutuk 87,940.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here