Komunidade Bairru Lita, Aldeia Maurate, Suku Nahareka, forma hodi kuru bee-moos, tuir regra ne'ebé sira rasik halo. Imajen TATOLI/Cipriano Colo

VIQUEQUE, 21 novembru 2019 (TATOLI)–Komunidade husi Suku Nahareka, Postu Administrativu Ossu, Munisípiu Viqueque, loroloron baku malu tanba hadau malu bee-moos.

“Loroloron ami haksesuk malu, baku malu, rakut malu, to’o halo rahun jerigen sira-ne’e tanba hadau malu bee”, abitante Olandina Sequeira (57) ba TATOLI, iha Bairru Lita, Aldeia Maurate, Nahareka, kinta ne’e.

Nia esplika, loroloron sempre baku malu tanba bee ho volume ne’ebé ki’ik tebes, tanba loron ida responsável ba tanki jerál loke oras rua de’it.

“Bee mai duni maibé ki’ik loos. Iha ami-nia bairu ne’e monta torneira ida. Ami iha koordenadór ida atu loroloron organiza, nune’e ami hotu-hotu bele hetan bee. Se bee sai boot, entaun loron ida ema ida bele enxe jerigen ualu to’o sanulu. Maibé, bainhira bee sai ki’ik, entaun ami enxe jerigen lima de’it”, nia haktuir.

Olandina hatutan, bee ne’e Organizasaun Naun Governamentál (ONG) ida mak dada husi fatin ida naran Abana maibé volume ki’ik tebes no tenke distribui ba aldeia lima ne’ebé pertense ba suku ne’e.

Aleinde ne’e, Diretór Interinu Eskola Ensinu Báziku Sentrál Primeiru no Segundu Síklu Nahareka, Guido Sequeira mós preokupa tanba bee laiha atu fasilita estudante sira durante prosesu aprendizajen.

“Ami-nia estudante sira atu hemu de’it mós susar, satán atu uza ba nesesidade sanitária, bee laiha”, Guido informa.

Entretantu, Xefe Suku Nahareka, Paulino Alberty Ximenes rekoñese mós katak ninia populasaun falta bee-moos, tanba bee ne’ebé oras ne’e dada ba komunidade volume ki’ik tebes.

Nia dehan, bee-matan antigu ne’ebé ho volume boot iha, maibé oinsá bele dada mai to’o komunidade nia leet, autoridade ne’e la hatene.

“Ha’u-nia komunidade kontinua enfrenta problema bee-moos. Bee mai ki’ik loos, halo komunidade hadau malu to’o baku malu. Autoridade lokál nia servisu loroloron mak rezolve problema baku malu tanba bee. Feto mane baku malu”, nia esklarese.

Nia hatutan, bainhira bee maran loos ona, entaun komunidade tenke lalin jerigen kuaze kilómetru tolu to’o haat hodi kuru iha bee-matan antigu.

Tuir observasaun TATOLI iha terrenu katak komunidade hadau malu bee ho jerigen litru 5 nian ne’ebé kada ema lori to’o tolu-nulu no forma hodi fahe tempu atu kuru.

Populasuan Suku Nahareka hamutuk 2.225 ho totál uma-kain 600, mai husi aldeia lima hanesan Makabu’u, Maurate, Darenau, Saborogo no Raila’a.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here