Presidente Komisaun F Parlamentu Nasionál, Maria Barreto. Imajen/Tatoli Egas Cristovao

DILI, 21 novembru 2019 (TATOLI)-Prezidente Komisaun F (asuntu saúde, seguransa sosiál no igualidade jéneru), Parlamentu Nasionál (PN), Maria Barreto husu ba Komisária Komisaun Nasionál ba Direitu Labarik (KKNDL), Dinorah Granadeiro katak ba futuru tau atensaun másima ba labarik sira iha Timor-Leste (TL), liuliu ba iha implementasaun Planu Asaun Nasionál (PAN) ba labarik atu kontrola no monitoriza husi liña ministeriál sira atu konsidera kompromisu polítika sira ne´ebé mak hatuur ona iha PAN labarik nian.

“Ha’u atu hateten de’it katak depois plenaria Orsamentu Jerál Estadu, membru parlamentu hamutuk ho Prezidente Parlamentu Nasionál sei reafirma fila fali lei protesaun ba labarik nian iha Parlamentu Nasionál no Komisaun F trata asuntu saúde ami sei tau iha prioridade ba lei ida ne’e, sei reativa fila fali depois mak ami haree ida ne’e katak lei ida ne’e la’o ho proteje ba direitu labarik tomak,” hateten Prezidente Komisaun F, Maria Barreto, iha Cristo Rei bainhira partisipa inaugurasaun Lampu Azul, iha ámbitu Komemorasaun Loron Nasionál ba Direitu Labarik, kuarta (21/11/2019).

Notísia relevante:Timor-Leste Garante Direitu Labarik

Prezidente Komisaun F ne´e akresenta, ida ne’e hanesan traballu ida ba Parlamentu Nasionál kinta lejislatura oinsá para tau prioridade ba lei ida ne’e no mós husu ba UNICEF atu kontinua kopera ho PN liuliu ba komisaun F atu aselera lei ida ne’e no hein katak finaliza iha tinan-2021 ba labarik Timor-Leste, ba lei ida ne’ebé mak proteje sira-nia direitu fundamentál ne’ebé mak konsagra iha konstituisaun RDTL (Repúblika Demokrátika Timor-Leste) nian.

“Ami konsidera nafatin loron konvensaun direitu labarik nian katak imi nia lian iha li´ur ami Parlamentu reforsa imi iha uma Fukun Parlamentu Nasionál,” garante reprezentante povu ne´e.

Nia konsidera, iha lian labarik husi Kinta Lejislatura Parlamentu Nasionál forte tebes, kualker deputadu se de’it bainhira ko’alia kona-ba direitu labarik sempre reforsa malu, fó hanoin ba malu liuliu fó hanoin ba Governu ida ne’e (Oitavu Governu) atu tau konsiderasaun direitu labarik ne’ebé mak estadu Timor-Leste ratifika ona, konvensaun direitu labarik nian.

PN Timor-Leste hanesan órgaun estadu iha Timor-Leste ratifika ona Konvensaun Direitu labarik iha tinan-2003

PN nia papel mak iha konvensaun ida ne’e, dahuluk PN tenke tau prioridade tenke tau ba iha Orsamentu Jerál Estadu (OJE) ne’ebé mak Governu haruka proposta ba iha PN.

Mundu tomak estadu no nasaun hamutuk ho UNICEF hodi selebra aniversáriu hodi festeza Konvensaun Direitu Labarik ba tinan-30 ne’ebé Nasaun Unida adota iha tinan-1989.

Hanesan Komisaun F FN ne’ebé trata asuntu saúde lori PN Timor-Leste hakarak hato’o kna’ar PN nian ne’ebé mak relasiona ho direitu labarik nian.

Hanesan Membru PN no prezidente Komisaun F ne’ebé trata asuntu saúde, seguransa sosiál, ajénsia ONU no mós instituisaun igreja nian atu bele kolabora hamutuk hodi bele hatan ba labarik sira-nia bem estar.

“Halakon ita-nia egois sira ne’ebé mak iha tanba iha instituisaun balun ne’ebé sei privatiza nafatin labarik sira nu’udar sira-nia asuntu projetu nian de’it no sira seidauk prontu atu dehan katak labarik ne’e nasaun nia patrimóniu,” friza Prezidente Komisaun F, Maria Barreto.

Notísia relevante:UNICEF-KNDL Inaugura Iluminasaun Lampu Azul Iha Cristo Rei

Jornaliasta :Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here