Komandante Jerál PNTL, Komisáriu Faustino da Costa. Imajen Tatoli/António Gonçalves

DILI, 21 novembru 2019 (TATOLI) – Komandante Jerál Polísia Nasionál Timor-Leste (PNTL), Komisáriu Faustino da Costa, kinta ne’e, hala’o soru-mutuk ho Prezidente Repúblika (PR), Francisco Guterres Lú Olo, hodi relata situasaun jerál iha rai-laran.

“Ohin ha’u mai informa ba Prezidente Repúblika kona-ba kazu rua. Ida maka akontesimentu asidente iha Metinaro no mós ida iha área Comoro nian”, tenik Faustino iha Palásiu Prezidensiál.

Alende ne’e, Komisáriu ne’e relata mós kazu Peskadór Alcino Pereira ne’ebé maka mate iha área tasi ibun Ai-Tarak Laran no mós ho joven ida-ne’ebé hemu tua to’o mate iha Otél área Rai-Kotu, Comoro.

“Kazu sira-ne’e hotu maka ami hato’o ba Prezidente. Ami hato’o mós kona-ba kazu sona malu iha Eskola Kristal nian, eskola 4 Setembru nian, no mós área seluk ne’ebé mosu konflitu,” Faustino akresenta.

Haree ba kazu ne’ebé barak mosu iha fatin oioin, Komisásiu Faustino kompromete katak PNTL sei esforsu nafatin atu koloka postu permanente no móvel iha kapitál Dili hotu.

“Durante ne’e ita kria ona postu permanente iha Dili laran no kada postu iha ema na’in-haat, maibé la konta ho postu tránzitu nian tanba iha hitu no kada postu iha ema na’in-neen”, nia haktuir.

Faustino subliña, kalan-kalan PNTL sempre halo patrullamentu rutina maibé parte ne’ebé iha risku mosu asidente sei kria fali maneira seluk hodi responde ba situasaun ne’ebé akontese iha kapitál Dili.

“Membru iha kapitál Dili bele dehan sufisiente tanba kapitál Dili hamutuk iha membru 500. Hosi membru hirak ne’e balun maka la halo serbisu ativu, balun abandonadu iha tinan barak nia laran. Entaun, ita harae dehan númeru ne’e boot maibé realidade operasionál ne’e ema la to’o 500,” nia dehan.

Jornalista: Hortençio Sanchez

Editór: Xisto Freitas

 

 

HAKEREK NO HATÁN

Please enter your comment!
Please enter your name here