Primeiru-Ministru, Taur Matan Ruak. Imajen Tatoli/Egas Cristovão

DILI, 21 novembru 20119 (TATOLI)–Primeiru-Ministru (PM), Taur Matan  Ruak, lakohi halo espekulasaun oioin kona-ba redusaun orsamentu.

“Ami haruka ona proposta orsamentu ba Parlamentu, depois maka ita sei haree tanba ha’u lakohi halo espekula saida maka iha ne’e. Montante ne’ebé ami haruka ba Parlamentu biliaun $1,950, maibé tempu diskusaun maka ita sei haree proposta karik iha alterasaun no iha área ida-ne’ebé”, tenik PM Taur hafoin enkontru semanál ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, kinta ne’e.

Notísia Relevante: PN Sei Redús OJE 2020 ho Maneira Aprezenta Proposta Durante Debate

Tuir Xefe Governu, ema bele iha opiniaun barak maibé diskusaun iha PN maka sei defini tanba Governu koordena ona ho deputadu sira hodi aprezenta proposta redusaun orsamentu iha diskusaun.

“Ida-ne’e só ita ba iha Parlamentu maka foin bele diskute. Iha li’ur ne’e ema hotu iha opiniaun oioin maibé diskusaun loloos ne’e iha Parlamentu Nasionál”, subliña PM.

Antes ne’e, Prezidente Komisaun C ne’ebé Trata Asuntu Finansa Públika, Fernanda Lay, hateten PN propoin ona atu Proposta OJE 2020 tenke redús entre biliaun $1,3 to’o $1,6, ho razaun labele liu Rendimentu Sustentável Estimadu (RSE), maibé depende ba Governu tanba sira maka halo orsamentu, la’ós PN.

Entretantu, iha segunda semana oin, Parlamentu Nasionál (PN) hahú debate Orsamentu Jerál Estadu (OJE) 2020 no votasaun finál globál sei akontese iha 12 dezembru.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here