Polisia Nasionál Timor Leste (PNTL) Munisípiu Dili kaptura ona suspeitu na’in rua ne’ebé envolve kazu lori kro’at sona kanek vítima Flávio da Costa (18) iha área estrada Eskola Sekundária 4 Setembru Balidi Dili. Imajen/Eugénio Pereira

DILI, 20 novembru 2019 (TATOLI)-Polisia Nasional Timor-Leste (PNTL) Munisípiu Dili, ohin, kaptura ona suspeitu na’in rua ne’ebé envolve iha kazu sona vítima Flávio da Costa (18) iha area estrada Eskola Sekundária Jerál 4 Setembru, Balide, Dili.

Iha tersa (19/11/2019), tuku 20:10 OTL, suspeitu sira lori motor taka oin ho kro’at ba sona vítima Flávio hodi rezulta vítima nia kotuk naklees no agora halo hela tratamentu intensivu iha Ospitál Nasionál Guido Valadares (HNGV).

Suspeitu na’in rua ne’e Polisia Munisípiu Dili ka’er iha sira nia rezidénsia parte Likintai, Taibesi, Dili, hamutuk ho evidénsia hanten motór Honda Beat mutin rua la iha xapa matríkula no Motór Mio-Z ida ho xapa matríkula K1860.

Segundu Komandante PNTL Munisípiu Dili, Superintendente Asistente Euclides Belo, informa, hafoin suspeitu rua halo asaun sona vítima sira motór halai kedas ba subar iha Likintai.

Parte Intelijénsia rekolla informasaun no buka tuir suspeitu no konsege hetan hodi kalan no ohin foin kaptura suspeitu rua hodi halo investigasaun kle’an.

“Komandu Munisípiu Dili dezde kalan too agora polisia la toba buka tuir suspeitu na’in ne’ebé ita identifika dezde hodi kalan depois sona tiha vítima Flávio da Costa sira halai. Ohin, polisia kaer ona hodi submete prosesu investigasaun kle’an no buka hatene identidade suspeitu sira nia,” dehan Euclides  Belo ba jornalista iha Komandu PNTL, Caicoli, Dili.

Suspeitu rua ne’e polisia kaer liuhosi informasaun ne’ebé PNTL rekolla hosi vítima no sasin sira hodi buka tuir padeiru suspeitu sira nian too hetan.

“Agora ami seidauk bele fó detalla kona-ba motivu tentativu omisídiu ne’e, tanba sei halo investigasaun,” Euclides Belo hateten.

Euclides alerta ba komunidade Dili lalika pániku ho kazu ne’e, tanba polisia kontinua hala’o seguransa iha sidade Dili atu la’o iha ambiente pás no hakmatek.

Tuir observasaun Ajénsia Tatoli nota suspeitu rua ho idade sei joven ho kondisaun fíziku isin nakonu ho tatto.

Kaptura Autór Tuda iha Bairru-Pité

Iha parte seluk, Komandu PNTL Dili liuhosi Eskuadra Don Aleixo kaer mós suspeitu ida ne’ebé envolve iha kazu konfronta tuda malu iha Lavandaria Bairru-Pité nian iha tersa lokraik.

“Ami ka’er mós suspeitu ida hosi grupu rua ne’ebé halo asaun tuda malu iha Bairru-Pité agora submete ona iha prosesu investigasaun,” nia hatete.

Suspeitu ne’e agora sei detein hela iha Sela Polisia Dili hodi hein prosesu investigasaun, tanba asaun tuda ne’e estraga mós komunidade balun nian uma.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here