Eskola Ensinu Báziku Sentrál 1,2,3 Fleicha, Postu Administrativu Maubisse, Munisípiu Ainaro. Imajen Tatoli/Egas Cristovão

MAUBISSE, 20 novembru 2019 (TATOLI) — Dezde 2017 to’o agora, Estudante sira iha Eskola Ensinu Báziku Sentrál (EBC-sigla portugés) 1,2,3 Fleicha, Postu Administrativu Maubisse, Munisípiu Ainaro, han de’it mak dose ho hemu xá iha  programa merenda eskolár.

Notísia Relevante : EBC Fleicha Laiha Bee-Moos no Eletrisidade

Estudante Eskola Ensinu Báziku Sentrál 1,2,3 Fleicha, Postu Administrativu Maubisse, Munisípiu Ainaro. Imajen/ Egas Cristovão

Xefe Gabinete Apoiu Tékniku (GAT) iha EBC 1,2,3 Fleicha, Edelburga Gheje, informa, programa merenda eskolár iha eskola refere bazeia ba totál alunu na’in 528, kompostu hosi mane 260 ho feto na’in 259 no transferénsia hosi eskola seluk hamutuk na’in sia (9).

Nia hateten, iha 2012 programa merenda eskolár la’o normal (han etu ho modo na’an), maibé tama iha inísiu tinan 2017 falla tiha no implementasaun programa merenda eskolár ne’e loron 20 de’it.

Xefe Gabinete Eskola Ensinu Báziku Sentrál 1,2,3 Fleicha, Edelburga Gheje. Imajen/ Egas Cristovão

“Uluk menu ne’e osan iha ami sosa na’an no foos, agora foos laiha entaun labarik sira merenda ho dose de’it no hemu ho xá, ema ida han dose fuan rua iha loron ida. Ami halo hanesan ne’e tanba produtu lokál talas ne’e karun tebes,” nia  informa ba Agência TATOLI, ohin, iha eskola Fleicha, Maubisse.

Tuir nia, loloos ne’e labarik sira han na’an mak di’ak liu, maibé tanba agora foos laiha ne’e mak labarik sira han de’it dose.

Nia dehan, oras ne’e foos laiha tanba agrikultór sira la halo ona to’os no agora produtu lokál karun liu.

“Labarik 528 ne’e labele atende hahán ho fehuk no talas tanba karun loos. Dose ne’e fornesedór hosi Maubisse. Tanba estudante ida han 0,25 sentavu, agora alunu sira hamutuk 528 vezes 0,25 no vezes tan fali loron efetivu. Kada períodu loron 30 no dala ruma períodu ida loron 35, ikus liu ne’e períodu ida loron 15 de’it,” nia esplika.

Nia dehan, kalendáriu ne’ebé oferese hosi Ministériu Edukasaun (ME) kompletu, maibé implementasaun dalaruma loron 30, dalaruma liuhosi ne’e.

Xefe Gabinete ne’e husu Ministériu Edukasaun, atu bainhira komesa ona ensinu aprendizajen ne’e merenda mós tenke hahú ona tanba estudante sira iha foho merenda iha sira mai, merenda laiha estudante sira la ba eskola.

Materia primeiru no segundu siklu iha neen (6) mak hanesan língua Portugés, Matemátika, Relijiaun Morál, Siénsia Naturaís, Artístika, Edukasaun Fízika no Saúde Ijiene.

Nune’e mós terseiru siklu nian mak hanesan língua Portugés, Edukasaun Sívika Direitus Umanus, Matemátika, Relijiaun Morál, Siénsia Fízika Naturaís, Tetum, Istória Jeografia, Desportu, Língua Inglés no Artístika.

Jornalista : Evaristo Soares Martins

Editór       : Francisco Simões

HAKEREK NO HATÁN

Please enter your comment!
Please enter your name here