Ministru Agrikultura no Peska, Joaquim José Gusmão dos Reis Martins. Imajen/Antonio Goncalves.

DILI, 20 novembru 2019 (TATOLI) – Ministru Agrikultura no Peska (MAP), Joaquim José Gusmão dos Reis Martins, hateten MAP ho Parlamentu Nasionál iha Komisaun D ne’ebé trata asuntu ekonomia no dezenvolvimentu deside hodi hamenus orsamentu MAP nian ba 2020 millaun $2-resin.

“Ami iha kompromisu para hatún orsamentu ne’e. Ne’ebé depois reuniaun iha Tibar, domingu ne’e kedas ami ho tékniku sira halo ezersísiu, konsege hatún tiha montante balu, ezersísiu interna ami-nian hatún millaun $2, maibé to’o fali mai Parlamentu Komisaun D iha segunda, ami ko’a balu tan hamutuk millaun $2,800-resin”, relata Joaquim José Gusmão dos Reis ba TATOLI iha Palásiu Governu, ohin.

Ministru Joaquim hatutan proposta orsamentu 2020 MAP nian hamutuk millaun $21,627.

“Osan ne’ebé ko’a la implika, iha balu implika más la ko’a iha atividade rutina ne’ebé mak la’o hanesan hasa’e produsaun ba hare, batar”, afirma Joaquim.

Governante ne’e salienta, orsamentu ne’ebé maka ko’a ne’e iha kapitál menór tanba planu atu sosa materiál sira hanesan komputadór no laptop, maibé tanba MAP hetan ona akordu ho parseiru dezenvolvimentu sira hodi apoia iha parte ne’e, nune’e deside redús tiha orsamentu ne’ebé aloka.

Diminui mós iha bens no serbisu hanesan iha viajen lokál no estranjeiru, iha kategoria transferénsia publika hanesan iha pekuária nian katak planeia atu sosa fahi, maibé tanba fahi ho moras agora, ne’ebé deside ko’a, nune’e mós ajuda grupu peska balu iha Ataúro.

Ministru dehan Planu Estratéjiku Dezenvolvimentu Nasionál mós hateten katak iha prioridade tolu mak; Edukasaun, Saúde no Agrikultura. Tanba ne’e maka ko’a orsamentu sira ne’e triste tebes, maibé hanoin katak se to’o iha tinan klaran orsamentu laiha, no hakarak atu aumenta espera Governu bele halo retifikativu nune’e retifika fali orsamentu hodi ajusta filafali.

Orsamentu MAP nian antes halo redusaun, iha kapitál menór hamutuk millaun $1,645, bens no serbisu millaun $12,761 no transferénsia públika rihun $214.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here