DILI, 20 novembru 2019 (TATOLI)–Deputada Bankada Partidu Kongresu Nasionál Rekonstrusaun Timor (CNRT-sigla Portugés), Fernada Lay, ne’ebé hanesan mós Prezidente Komisaun C trata asuntu Finansa Públika hateten CNRT nia hanoin orsamentu tenke redús to’o biliaun $1.3 ka 1.6 maibé depende ba Governu tanba Governu mak halo orsamentu, la’ós Parlamentu Nasionál.
“Ami hateten ona katak orsamentu ba 2020 nian tenke redús entre biliaun $1.3 ka 1.6. Maibé, Governu mak halo orsamentu, la’ós Parlamentu Nasionál. Ami bele la konkorda tanba sustentabilidade fiskál, maibé bele dehan labele konvense ami iha debate atu tau orsamentu ne’e ba biliaun $1.6,” deputada dehan ba Agência Tatoli iha Parlamentu Nasionál, kuarta ne’e.
Tanba ne’e, nia husu ba públiku tenke komprende. Bazeia ba ezekusaun loos duni CNRT preokupa bainhira hatún osan hosi Fundu Minarai la konsege ezekuta hotu ka sustentabilidade fiskál ladún di’ak.
“Haree ba ida-ne’e mak ami husu atu redús. Maibé, ko’a to’o hira ami tenke haree Governu iha proposta. Governu aseita ho proposta ne’ebé hato’o no bele mós la aseita. Se la aseita retira proposta. Ne’e buat ida normál iha Parlamentu Nasionál,” Fernanda esplika.
Nia hatutan, bainhira husu atu redús orsamentu refere, Governu atu simu ka la simu, diskusaun iha plenária mak deside.
“Ami halo proposta hodi hato’o ba Governu atu ko’a osan ne’e ba hira. Maibé, ida-ne’e iha plenária mak ita haree. Se Governu ko’a entaun ko’a ba! Se la ko’a depois pois mak ita haree iha plenária,” nia subliña.
Antes ne’e, Deputadu Bankada CNRT, Domingos de Carvalho, hateten montante orsamentu 2020 tenke hanesan ho 2019 nian, ne’ebé hafoin reapresiasaun no halo redusaun millaun $650, montante ikus ne’ebé hetan promulgasaun husi Prezidente Repúblika, Francisco Guterres ‘Lú Olo’ maka, biliaun $1,482.
“Karik maka Governu mantein ho biliaun $1,950, ne’e ami rasik la hatan a-favór, nune’e mós halo redusaun tenke hetan konsensu. Bainhira Governu mantein ami sei vota kontra hanesan ami-nia kolega deklara ona ne’e ba públiku katak CNRT sei vota kontra”, tenik Deputadu Bankada Governu ne’e ba jornalista sira iha resintu Parlamentu Nasionál, foin lalais.
Nia subliña, Proposta OJE 2020 tenke iha padraun ida katak to’o biliaun $1,3 ka biliaun $1,4, nune’e labele liu Rendimentu Sustentável Estimadu (RSE).
Maski nune’e, liuhusi Konferénsia Nasionál AMP ne’ebé hala’o iha Sentru Formasaun Tibar, sábadu (16/11/2019), iha pontu 3 deside mós halo redusaun ba OJE 2020 maibé la sita montante redusaun.
Jornalista: Hortençio Sanchez
Editór: Xisto Freitas
