Ofisial Governu Lokal (OGL) Postu Administrativu Maubisse, Munisípiu Ainaro Claudino Mendonça. Imajen/Egas Cristovão

MAUBISSE, 20 novembru 2019 (TATOLI) –Autoridade Postu Administrativu Maubisse, Munisípiu Ainaro, fó ona orientasaun ba konsellu suku atu kontrola atividade sunu rai ne’ebé hamosu inséndiu maka’as hodi afeta ba plantasaun no komunidade nia uma.

Notísia Relevante : Komunidade Maubisse Preokupa Ba Bee-Moos

Ofisiál Governu Lokál Postu Administrativu Maubisse, Claudino Mendonça, hateten,  orientasaun ne’e hodi kontrola asaun komunidade nian sunu rai no próteze ambiente ho ai-horis hosi atividade sunu rai ne’e.

“Ita haree bailoron naruk ida ne’e halo populasaun nia plantasaun kafé iha Maubisse namlaek hotu to’o balun mate. Bee-moos hahú menus,” hateten   Claudino Mendonça, hodi responde Ajénsia TATOLI, iha Administrasaun Postu Administrativu Maubisse, kuarta (20/11/2019).

Nia haktuir, suku sia (9) iha Maubisse maioria iha plantasaun kafé, maibé tanba alterasaun klimátika halo kafé balun mate. Nune’e mós ai-akásia ne’ebé fó mahon ba plantasaun kafé kuaze tahan laiha ona, entaun laiha ona mahon ba plantasaun kafé.

“Loloos oras hanesan ne’e batar boot hotu ona, maibé atu tama ona dezembru udan seidauk monu-rai, ne’e ameasa boot ba plantasaun kafé”, nia hateten.

Bee-Moos iha Maubisse Hahú Menus

Ofisiál Governu Lokál Postu Administrativu Maubisse, Claudino Mendonça, subliña tan, ho bailoron naruk ne’e halo bee-moos iha Maubisse hahú menus.

“Bee-matan Era-Ulo no bee-matan Bukana parte Suku Maubisse nian agora volume bee menus loos, Pouzada Maubisse mós bee laiha, agora sira iha pouzada mai kuru fali iha Maubisse Vila mak lori sa’e ba,” nia fó sasin.

Komunidade iha Maubisse Vila mós komesa lori masa ba kuru no lalin bee-moos. Mezmu Organizasaun Naun Governamentál (ONG) Plan Internasionál ho Fundasaun
Hafoun Timor-Leste (FHTL) serbisu hamutuk ho Administrasaun Maubisse  halo hela reabilitasaun kanalizasaun bee-moos.

Bazeia ba sensu 2015, totál populasaun iha Postu Administrativu Maubisse iha suku sia (9) aldeia 62, ho totál populasaun hamutuk 22.022 kompostu hosi mane 11.188, feto 10.834 ho xefe família hamutuk 3604. Área postu Maubisse luan 260.97km2.

Suku sia (9) iha Postu Administrativu Maubisse nia laran mak hanesan Suku Aituto, Edi, Fatubessi, Horai Quic, Liurai, Manelobas, Manetu, Maubisse no Maulau.

Suku Aituto iha aldeia sia (9), totál populasaun 4539 (mane 2301 no feto 2238) ho xefe família 767. Suku Edi iha aldeia neen (6), totál populasaun 1482 (mane 763 no feto 719) ho xefe família hamutuk 229.

Suku Fatubessi iha aldeia neen (6), totál populasaun 836 (mane 408 no feto 428) ho xefe família 145. Suku Horai Quic iha aldeia haat (4) totál populasaun 1775 (mane 862 no feto 913) ho xefe família 353. Suku iha aldeia haat (4), totál populasaun 660 (mane 337 no feto 323) ho xefe família 121.

Suku Manelobas iha aldeia haat (4) ho totál populasaun 1149 (mane 575 ho feto 573) no xefe família hamutuk 186. Suku Manetu iha aldeia hitu (7) ho totál populasaun 2413 (mane 1213 no feto 1200) ho xefe família 362.

Suku Maubisse iha aldeia 12 ho totál populasaun 6184 (mane 3186 no feto 2998) ho xefe família 974. Suku Maulau iha aldeia 10 ho totál populasaun 2985 (mane 1523 ho feto 1462) no xefe família 467.

Jornalista : Evaristo Soares Martins

Editór       : Francisco Simões

HAKEREK NO HATÁN

Please enter your comment!
Please enter your name here