Prezidente Autoridade Nasional Komunikasaun, João Olívio Freitas. Imajen Tatoli/Natalino Costa

DILI, 20 novembru 2019 (TATOLI) – Prezidente Autoridade Nasionál Komunikasaun (ANC, sigla portugés), João Olívio Freitas, hateten ANC sei aplika taxa spectrum frekuénsia rádiu ba serbisu telemovel bainhira kria ona regulamentu.

“Timor Telecom (TT), Telkomsel no Telemor sei selu taxa spectrum frekuénsia rádiu mobile, hodi kontribui reseita nasionál ho di’ak liután, bainhira ANC kria ona regulamentu”, João Olívio ba Ajénsia Tatoli iha nia kna’ar fatin Kaikoli, ohin.

Tanba ne’e, iha 11 novembru, ANC halo tiha ona konsulta públika kona-ba ezbosu regulamentu presu taxa serbisu telemovel ba operadór telekomunikasaun iha Timor-Leste.

Tuir tempu ne’ebé determinadu ba regulamentu presu taxa serbisu telemovel, ANC sei konklui iha dezembru no sei aprova. Maibé kuandu tama iha vigór maka operadór sira la kumpre, sira sei hetan sansaun, tanba ANC maka nu’udar órgaun reguladór ba setór komunikasaun iha Timor-Leste.

Nune’e maka ANC husu ba operadór sira tenke submete ba regulamentu kona-ba taxa spectrum frekuénsia rádiu nian bainhira tama ona iha vigór, nune’e mós lei sira seluk ne’ebé atu regulariza utilizasaun frekuénsia rádiu.

Aléinde ne’e mós, operadór telekomunikasaun sira hakarak aumenta tan frekuénsia rádiu iha momentu ne’e, entaun sira tenke selu taxa ba frekuénsia rádiu telemovel.

Ezemplu; operadór sira ne’ebé maka daudaun iha Timor-Leste, iha frekuénsia rádiu 45 MHz ba mobile, maibé ba futuru maka operadór sira hakarak aumenta adisionál ho 800 MHz ka 900 MHz entaun operadór sira tenke selu fali.

Entretantu, antes ne’e Governu fó lisensa ba operadór telekomunikasaun sira ho livre taxa durante tinan 15 no ohin bá oin, ANC tenke halo regulamentu hodi regula operadór sira hodi aplika presu taxa spectrum frekuénsia rádiu mobile.

Regulamentu ba presu taxa spectrum frekuénsia rádiu mobile ne’ebé ANC sei aplika ho baze artigu 61 hosi dekretu lei númeru 15/2012.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here