Embaixadór Uniaun Europeia (EU) iha Timor-Leste (TL), Andrew Jacobs. Imajen Taroli/Cipriano Colo

DILI, 19 novembru 2019 (TATOLI)–Embaixadór Uniaun Europeia (EU) iha Timor-Leste (TL), Andrew Jacobs, halo audiénsia ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Dili, ohin, hodi ko’alia kona-ba parseiru dezenvolvimentu. 

Hafoin enkontru, Diplomata Uniaun Europeia ba mídia hateten, nia sente onradu tebes hasoru Prezidente Repúblika hodi reafirma nafatin misaun nu’udar parseiru dezenvolvemintu ba Timor-Leste.

Nia hatutan, Uniaun Europeia mós hakarak reforsa diálogu inisiadu husi Nasaun Unida, hodi haree liubá direitu ema-nian iha demokrasia no preokupasaun kona-ba mudansa klimátika.

Diplomata ne’e informa liután, Uniaun Europeia hamutuk ho Governu Timor-Leste analiza hela formatu no prioridade hodi kanál orsamentu tuirmai no sei hametin serbisu liuliu iha área ne’ebé Uniaun Europeia aumenta valór iha governasaun di’ak no dezenvolvimentu rurál.

Kona-ba modelu dezenvolvimentu ne’ebé Uniaun Europeia sei apoiu, embaixadór sita katak sei aumenta iha área nutrisaun no jestaun finansa públika.

“UE sei reforsa tan apoiu ba Timor-Leste iha área nutrisaun no finansa públika”, nia hateten.

Andrew afirma katak sei reforsa kooperasaun ho sosiedade sivíl ba dezenvolvimentu sustentável, direitu ema-nian liuhusi kombate violénsia jéneru.

Nia observa no rekoñese katak relasaun entre  TL ho Uniaun Europeia di’ak tebes iha implementasaun programa sira.

“UE ho Timor-Leste iha ona relasaun ne’ebé di’ak no forte tebes. Parte UE observa katak durante ne’e iha ona progresu dezenvolvimentu ne’ebé di’ak tebes, liuliu iha implementasaun programa sira tuir akordu ne’ebé estabelese ona”, nia haktuir.

Entretantu, antes ne’e, UE apoia ona Timor-Leste dezde tinan 1999 to’o ohin loron, ho montante orsamentu hamutuk millaun $300 resin.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here