Diretór MAP Munisipiu Ainaro, Lucio R. Ribeiro. Imajen/Egas Cristovão

AINARO, 19 novembru 2019 (TATOLI) — Peskiza ne’ebé hala’o liuhosi Sensu Agríkola 2019 mak bele deskobre persentajen populasaun Timor-Leste moris iha agrikultura.

Notísia Relevante : Mudansa Klimátika ‘Provoka’ Bee Maran

Sensu Agríkola ne’e lidera hosi Ministériu Finansas (MF) no Ministériu Agrikultura no Peska (MAP), ne’ebé rekolla dadus hotu-hotu iha territóriu nasionál. Programa sensu agríkola ne’e dahuluk realiza iha Timor-Leste.

Diretór MAP Munisípiu Ainaro, Lúcio Romeo Ribeiro, esplika peskiza sensu agríkola ne’e realiza hodi rekolla dadus ne’ebé sufisiente hodi halo planu ba iha futuru, tanba área agrikultura produtivu.

“Ita bazeia ba dadus populasaun, ema lansa katak 85% ne’e moris iha agrikultura. Ne’e loos ka lae, peskiza hosi sensu agríkola ne’e mak bele deskobre,” informa Diretór MAP Ainaro, Lúcio Romeo Ribeiro, ohin, ba Agência TATOLI iha Edifísiu MAP Ainaro.

Notísia Relevante : Sensu Agrikultura 2019 Prolonga to’o 30 Outubru ba Área Balun Ne’ebé Seidauk Hotu

Lúcio Romeo Ribeiro hatutan, Estadu hasai osan boot kuaze millaun $5 ba atividade sensu agríkola ne’e no bainhira peskiza ne’e hotu, Ministériu Finansas (MF) sei fó-sai ba públiku no MF sei rekomenda ba iha Ministériu Agrikultura no Peska bele responde ba Planu Estratéjiku Dezenvolvimentu Nasionál (PEDN) 2011-2030.

Nia dehan, provizoriamente dadus agríkola Ainaro nian seidauk bele fó-sai tanba dadus rai iha server, tinan oin sei anunsia liuhosi portál Ministériu Finansas nian.

“Temporariamante, ha’u bele dehan katak Ainaro kuaze ema 75% ne’e moris iha agrikultura, mas atu deskobre ida ne’e sensu agríkola mak bele responde,” nia hateten.

Notísia Relevante : Sensu Agríkola 2019 Ofisialmente Lansa Ona

Jornalista : Evaristo Soares Martins

Editór       : Francisco Simões

HAKEREK NO HATÁN

Please enter your comment!
Please enter your name here