Xefe Sentru Saúde Internamentu Ainaro, Arquimenio Orlean de Araújo. Imajen/Egas Cristovão

AINARO, 19 novembru 2019 (TATOLI)—Bailoron naruk ne’ebé provoka rai-manas no rai-rahun lori moras infesaun respiratóriu ba povu nia saúde. Realidade, iha Sentru Saúde Internamentu (SSI) Ainaro dezde inísiu janeiru to’o novembru, rejista moras infesaun respiratóriu aas tebes.

Notísia Relevante :Sentru Saúde Internamentu Ainaro Laiha Tanki Rezerva Bee-Moos 

Xefe Sentru Saúde Internamentu Ainaro, Arquimenio Orlean de Araújo, hateten,  durante ne’e moras ne’ebé frekuente aas ne’ebé rejistu iha SSI Ainaro mak infesaun respiratóriu no tuir mak pneumonia, diarreia ho moras kulit balun.

 Xefe Sentru Saúde Internamentu Ainaro ne’e ba TATOLI iha nia servisu fatin iha Ainaro Vila, hateten, kauza hosi moras infesaun respiratóriu ne’e tanba fatór ambiente la moos no la seguru. Seluk fali mak komunidade nia toman sunu ai no ahi suar maka’as.

“Prevensaun mak edukasaun promosaun maka’as liu nune’e komunidade bele hadi’a nia ambiente no mós ijiene pesoál, karik idak-idak bele hadi’a ninia saúde rasik hanesan fase-liman, tenke hariis dadeer, meudia no kalan, nune’e evita moras hirak ne’e,” esplika Arquimenio Orlean de Araújo.

Nia hatutan, moras rejista aas daruak mak pneumonia, tanba moras refere króniku ne’ebé kleur ho tempu ne’ebé naruk, entaun automátika hosi infesaun respiratóriu  da’et ba iha pneumonia.

“Diarea ne’e aas tanba nia kauza imediata, imediata ne’e mak dehan kontaktu baktéria ba iha labarik ne’ebé afeta ba iha diarea entaun baktéria ne’ebé mak iha ambiente ne’ebé lamoos, entaun labarik ne’ebé ijiene ladi’ak, la kuidadu-aan, halimar barak, la fase-liman mak han fasil hetan moras diarea,” nia hateten.

Nia hatutan, Sentru Saúde nia atendimentu ba pasiente sira sempre halo edukasaun promosaun maka’as liuhosi doutór sira, kada semana ona profisionál idak-idak tenke halo promosaun edukasaun.

Sentru Saúde Internamentu nia atendimentu iha loron segunda no tersa ne’ebé sempre atende pasiente na’in 80 to’o na’in 90, maibé kuarta no kinta menus uitoan tanba kada suku sira destaka ona médiku.

Sentru Saúde Internamentu ne’e fó atendimentu ba komunidade hosi suku Ainaro, Manutasi, Mau-Ulo, Soro, Suro Kraik, Cassa no Maununo. Nune’e mós komunidade hosi Postu Administrativu Hatu-Udo no Postu Administrativu Hatu-Builico.

Médiku ne’ebé servisu iha sentru saúde na’in-hitu (7) inklui suku 7 ne’e hamutuk na’in-sia (9). Na’in-lima mak servisu iha Sentru Saúde Internamentu ne’e, na’in-tolu (3) iha suku tolu (3), ida iha suku ida no ida maka reforsa iha saúde munisípiu nian.

Jornalista : Evaristo Soares Martins

Editór       : Francisco Simões

HAKEREK NO HATÁN

Please enter your comment!
Please enter your name here