Diretór Nasionál Aprovizionamentu MOP Timor-Leste, Quintiliano Belo no Assistente CoST Timor-Leste, Andreas Tani, partisipa konferénsia CoST Iha Dubai. Imajen/Espesiál.

DILI, 19 novembru 2019 (TATOLI) – Ministériu Obra Públika (MOP) Timor- Leste sai observadór iha konférensia CoST Infrastructure Transparency Initiative iha Dubai.

Reprezenta Ministru Obra Públlika, Diretór Nasionál Aprovizionamentu Quintiliano Afonso Belo, via média sosiál ba Tatoli katak partisipa semináriu ne’e, nu’udar oportunidade osan-mean hodi promove Timor-Leste nia transparénsia no akuntablidade prosesu sira aprovizionamentu infraestrutura sira liuhusi Construction Sector Transparency (CoST) internasionál.

Quintiliano Afonso Belo dehan CoST internasional nu’udar organizasaun internasionál ne’ebé harii husi multi parseria internasionál atu atinje meta importante sira hanesan, transparénsia públika no akuntablidade finansa publika iha setór infraestrutura, inklui mós asegura kualkér tranzasaun infraestrutura ba konsumidór públiku sira hahú husi siklu preparasaun ba konkursu públiku projetu konstrusaun, prosesu implementasaun no konklui projetu konstrusaun.

Iha konferénsia ne’e mós, Timor-Leste aprende no manán koñesimentu barak kona-ba lala’ok CoST nian husi Rejiaun Amérika Latina, Rejiaun Áfrika no Rejiaun Ázia no Europa kona-ba sira-nia forsa no frakeza, bainhira implementa CoST iha sira-nia rain, inklui solusaun di’ak hodi haforte no elimina frakeza sira ne’ebé mosu durante implementasaun CoST.

Aléinde ne’e, Timor-Leste mós hetan oportunidade hodi fahe esperiénsia balun ne’ebé MOP implementa daudauk hodi promove transparénsia no akuntablidade finansa iha área infraestrutura tuir polítika no orientasaun husi Ministru Obra Públika Salvador Eugenio Soares dos Reis Pires.

Diretór ne’e afirma, MOP Timor-Leste nian prontidaun ba iha membru CoST ne’ebé mai husi Rejiaun Amérika Latina, Áfrika, Ázia no Europa nia oin katak, promove transparénsia no akuntablidade área infraestrutura Timor-Leste regionál no internasionalmente nu’udar ajenda ensesiál iha polítika Governu nian, nune’e mak kualkér dadus ne’ebé Diresaun Nasionál Aprovizionamentu iha sei publika iha plataforma tranparénsia nian ne’ebé CoST prepara tiha ona.

Konferénsia ne’e hala’o iha Dubai Uni Emirat Arab durante loron 19-20 novembru 2019 no hetan suporta husi Governu Inglaterra, UNDP no mos CoST rasik.

Iha konferénsia refere MOP Timor-Leste sai nu’udar observadór ne’ebé atende husi Diretór Nasionál Aprovizionamentu, Quintiliano Belo no Assistente CoST Timor-Leste, Andreas Tani, antes ofisialmente sai membru ba organizasaun CoST rejiaun Ázia-Europa ne’ebé sei lansa iha fin de janeiru 2020.

Entretantu, polítika VIII Governu ne’ebé aprovadu iha Parlamentu Nasionál katak, boa governasaun no transparénsia nu’udar programa prioritáriu ne’ebé MOP, Salvador Eugénio Soares dos Reis Pires komprometidu atu promove prosesu aprovizionamentu kona-ba infraestrutura hotu-hotu ne’ebé MOP mak nu’udar na’in ba projetu hirak ne’e.

Tanba ne’e, Ministru Salvador hamutuk ho tékniku sira halo esforsu tomak hodi bele realiza meta programa Governu Daualuk nian, liuhusi envolve ativamente iha forum internasionál hanesan CoST ne’ebé foka liu ba transparénsia no akuntabilidade projetu infraestrutura ba públiku.

Notísia relevante : Tinan ne’e, Timor-Leste Kandidata Atu Sai Membru CoST

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here