Koordenadór AIFAESA, Abílio Oliveira Sereno. Imajen/Egas Cristovão.

DILI, 19 novembru 2019 (TATOLI) – Komisaun D Parlamentu Nasionál ne’ebé trata asuntu ekonomia no dezenvolvimentu realiza fali enkontru ho Autoridade Inspesaun no Fiskalizasaun Atividade Ekonómika Sanitária no Alimentár (AIFAESA) hodi halo redusaun ba orsamentu.

Tuir Koordenadór AIFAESA, Abílio Oliveira Sereno, hateten tanba Parlamentu Nasionál liuliu Komisaun D preokupa ho montante Orsamentu Jerál Estadu (OJE) ne’ebé boot, nune’e bolu fali Governu atu haree hamutuk hodi halo redusaun.

“Tanba Komisaun D preokupa ho orsamentu 2020 sa’e maka’as to’o biliaun $1.950, entaun Governu ho Parlamentu haree para oinsá redús uitoan, entaun sira hothotu iha konkordánsia para hatún orsamentu ne’e, atu hatún ne’e tenke hatún hotu hosi ministériu no instituisaun hothotu ne’e maka hosi ami-nian hasai rihun $40”, hateten Koordenadór AIFAESA, Abílio Sereno, hafoin enkontru ho Komisaun D, ohin.

Abílio hatutan, deside hasai montante rihun $40 hosi totál proposta OJE 2020 AIFAESA nian hamutuk millaun $1,300-resin (um milhão trezentos e tal).

“Osan ne’e hasai, ba ami la barak no la afeta ba ami-nia planu sira ne’ebé iha ona, no osan ne’e ami tau iha rezerva ninian. La afeta tanba ami-nia viajen lokál no estranjeiru mantén hela, viajen estranjeiru labele hasai liuliu ba Cabo-Verde tanba ami maka prezidente FISAE no serbisu seluk nafatin”, Abílio esklarese.

Nune’e, Abílio esplika orsamentu viajen estranjeiru AIFAESA nian hamutuk rihun $30. “Montante ne’ebé prevee ba atu estabelese hodi harii armazein no laboratóriu nafatin hela”, katak nia.

Entretantu orsamentu ba laboratóriu millaun $2 no ba armazein rihun $350 mil.

Notísia relevante : PN Sei Redús OJE 2020 ho Maneira Aprezenta Proposta Durante Debate

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here