Doutór Rui Maria de Araújo

Artigu husi: Doutór Rui Maria de Araújo

Introdusaun

Uluk nia na´in, hakarak agradese Ministériu Saúde ninia jentileza hodi konvida ha´u, atu kolia kona-ba Kobertura Universál Saúde, iha forum ida ne’e. Ha´u sente onradu tebes, tanba hetan oportunidade atu bele partilla buat balun ne’ebé ha´u hatene, kona-ba asuntu ida ne’e (Kobertura Universál Saúde) iha àmbitu lansamentu estratéjia finansiamentu saúde, périodu tinan 2019 to’o tinan 2023..

Saida maka Kobertura Universál Saúde?

Molok atu hakat do’ok liu-tan, iha intervensaun ida ne’e, permite ha´u halo lai pergunta ida: saida maka Kobertura Universál Saúde?

Objetivu Dezenvolvimentu Sustentável (ODS) ka iha lian inglés koñesidu liu ho sigla SDG (Sustainable Development Goals), koloka saúde iha ODS númeru 3, no koloka mós Kobertura Universál Saúde, nu’udar alvu sentrál ba ODS númeru 3. Dehan ho lia-fuan seluk, iha kontestu ODS no mós iha Organaziasaun Mundiál Saúde (OMS) nia laran, Kobertura Universál Saúde ninia objetivu prinsipál maka lori ‘’ema hotu-hotu hodi hetan kuidadu saúde ne’ebé sira presiza, sem liuhusi difikuldade finanseira, tanba tenke hasai osan husi bolsu rasik

Ha´u subliña iha ne’e: Ida, kobertura ba kuidadu saúde ne’ebé presiza, katak, kuidadu saúde ho kualidade hahú husi promosaun, prevensaun, tratamentu, reabilitasaun no kuidadus paliativus. Rua, kobertura ba difikuldade finanseira, katak hetan protesaun ka kobertu husi risku finanseiru. Tolu, kobertura Universál, katak kobertura ba ema hotu-hotu, sem iha distinsaun entre ki’ak ka riku, hela iha sidade ka hela iha área rurál.

Husi perspetiva debate konseituál-akadémiku, iha sorin ida, matenek na´in balun, liu-liuhusi Amérika Latina, atribui orijen konseitu Kobertura Universál Saúde ba esforsu husi proponente ideolojia liberal sira, hodi bele hamenus Estadu ninia papél iha prestasaun ka provizaun, no mós iha finansiamentu ba saúde. Ba sira, termu Kobertura Universál Saúde ambigu, ka la klaru, no hamosu interpretasaun no abordajen oin-oin (ka la hanesan), husi autóridade governu nian, organizasaun governamental no naun-governamentál sira, liu-liu iha paizes em dezenvolvimentu. Husi perspetiva matenek na´in sira ne’e, iha proposta ba konseitu inisiál ne’ebé Banku Mundial, Rockefeller Foundation, no OMS hamosu 1 Intervensaun iha Fórum Finansiamentu Saúde, 8 Novembru 2019.

Iha tinan 2004, Kobertura Universál Saúde ninia objetivu prinsipál maka hamosu protesaun finanseira ba sidadaun sira, no proposta ne’e iha komponente importante tolu: Primeiru, finansiamentu liuhusi ‘’pooling’’ ka halibur hamutuk osan, hodi finansia kuidadus saúde; Segundu, afiliasaun kumpulsória ba modalidade seguru saúde naran ida; Terseiru, definisaun ba pakote servisus limitadu ida, hodi bele finansia ho osan ne’ebé halibur ona. Komponente tolu ne’e, hamenus papél Estadu nian, hodi sai de´it nu’udar regulador sistema saúde iha nasaun ida. Prestasaun kuidadus saúde, bele husik ba setór privadu, liuhusi servisu organizasaun privada ba prestasaun saude (hanesan ospitais / clinicas privadas), no ninia finansiamentu bele husik ba empreza sira ne’ebé opera iha área seguru saúde nian, atu bele finansia pacote servisu ne’ebé definidu ona.

Sira (matenek na´in sira husi Amérika Latina) diskorda, ka la konkorda ho pozisaun ida ne’e. Ba sira, kobertura Universál iha kuidadus no finansiamentu ba saúde (ka buat ne’ebé konseitu Kobertura Universál Saúde husi Banku Mundial, Rockefeller Foundation ho OMS mós defende), bele de´it atinji, liuhusi buat ne’ebé sira hanaran Sistema Universál Saúde, katak sistema ida ne’ebé finansiadu públikamente, liuhusi sistema impostu no kontribuisaun social, (la´ós finansiadu liuhusi empreza privadu ba segurus), no Estadu tenke assume papél determinante (la´ós de´it regulador) iha prestasaun kuidadus saúde, no mós iha finansiamentu ba kuidadus saúde ne’e rasik.

Iha sorin seluk, matenek na´in sira husi OMS defende katak, Maske nasaun barak maka sei susar atu atinji objetivu ne’ebé define ona ba Kobertura Universál Saúde (tuir konseitu inisiál husi Banku Mundial, Rockefeller Foundation no OMS, nasaun hirak ne’e sei bele atinji obejetivu hirak ne’e, uainhira halo esforsu hodi bele aumenta asesu ba kuidadus saúde. Tuir matenek na´in hirak ne’e, independentemente husi papel ne’ebé Estadu hala’o iha sistema saúde nia laran, nasaun sira ne’e, sei konsege atinji Kobertura Universál Saúde uainhira ninia populasaun konsege iha asesu ba kuidadu saúde ne’ebé sira presiza, no mós hetan benefisiu husi protesaun finanseira, ka sei la presiza gasta osan husi bolsu rasik, hodi bele hetan asesu ba kuidadu saúde hirak ne’e.

Asesu, signifika oportunidade no possibilidade atu hetan kuidadu saúde ne’ebé komunidade presiza no mós hetan protesaun finanseira. Lia fuan xavi, iha ne’e maka: Oportunidade no posibilidade. Tan ne’e, sei la iha Kobertura Universál Saúde, uainhira la iha asesu Universál, ka uainhira la iha oportunidade no possibilidade ba ema hotu atu asesu kuidadus saúde.

Tuir matenek na´in sira husi OMS ne’e, asesu iha komponente tolu: Primeiru, maka asesibilidade fizika. Ida ne’e signifika asesibilidade ba servisu saúde ho kualidade, iha distánsia ne’ebé razoável, funsiona tuir oráriu, sistema markasaun konsulta, no aspetu seluk husi organizasaun no prestasaun, ne’ebé permite ema atu asesu ba servisu hirak ne’e, uainhira sira presiza. Segundu, maka asesibilidade finanseira, ka posibilidade atu selu kuidadu saúde ne’ebé hetan, sem liuhusi difikuldade finanseira. Iha ne’e, la´ós sura de´it presu husi kuidadu saúde, maibé mós, kustu indiretu, no kustu husi oportunidade ka benefisiu hirak ne’ebé ema ne’e lakon, karik nia halo servisu produtivu ruma, tanba de´it nia tenke lakon tempu hodi ba simu kuidadus saúde, purezemplu kustu transporte ba-mai husi uma ba fasilidade saúde, no mós kustu ne’ebé asosiadu ho falta servisu. Terseiru, maka aseitabilidade. Ida ne’e envolve ema ninia hakarak atu buka kuidadu saúde. Aseitabilidade ki’ik, uainhira ema iha persesaun katak kuidadu saúde ne’ebé iha la dun efetivu, ka uainhira fatór sósiu-kulturál hanesan lian, idade, jéneru, etnisidade ka relijiaun husi prestadór kuidadus saúde, dezenkoraja komunidade atu buka kuidadu saúde hirak ne’e.

Tuir matenek na´in hirak ne’e, Kobertura Universál Saude, atinjivel (ka bele de´it atinji) uainhira kuidadu saúde asesível fizikamente, finanseiramente mós asesivel, no hetan aseitasaun husi utilizadór sira.

Kobertura Universál Saúde iha Timor-Leste

Iha tinan 2015, Timor-Leste, hamutuk ho nasaun lubuk-oan ida, sai mós proponente importante ida ba prosesu dezenvolvimentu no adosaun ODS iha Assembleia Jerál Nasoens Unidas. Pergunta ne’ebé mosu hafoin haree perspetiva konseitual-akadémika iha leten maka: Oin sá ho situasaun iha TimorLeste? Ita la’o ona to’o iha ne’ebé? Ita la’o iha dalan ne’ebé proponente idelojia liberal sira advoga ba konseitu Kobertura Universál Saúde, ka ita hala’o Sistema Universál Saúde husi matenek na´in Amerika Latina sira? Oin sá ho asesu ba kuidadu saúde, nu’udar pasu atu beje atinji Kobertura Universál Saúde iha Timor-Leste?

Parte tuir mai husi intervensaun ida ne’e, sei buka atu direta ka indiretamente responde ba pergunta hirak ne’e, no ita sei hahú hodi haree dadus ikus-liuhusi OMS, kona-ba Kobertura Universál Saúde iha Timor-Leste.

Iha tinan 2018, OMS Rejiaun Sudeste Aziátiku iha ninia publikasaun kona-ba Timor-Leste ninia perfil ODS ba tinan 2018 4, hatudu katak indise kobertura servisu, nu’udar sasukat ida ba Kobertura Universál Saúde, ne’ebé uza dadus 2010 to’o 2017, relasiona ho indikadór sanulu-resin- ne’en, maka 46% de´it. Ida ne’e signifika, Kobertura Universál Saúde iha Timor-Leste iha tinan 2017 foin maka 46%, ka iha lia-fuan seluk, metade husi populasaun maka la hetan kobertura ba servisus saúde esensiais. Indise kobertura servisu ida ne’e, tuir loloos tenke sura ho dadus husi indikadór sanulu-resin-ne’en, maibé iha kazu Timor-Leste nian, iha indikadór tolu maka la sura, (tanba dadus la kompletu) hanesan (a) kobertura ba tratamentu HIV/SIDA ho aimoruk antiretroviral, (b) screening ka rastreiu ka kankru servix, no (c) asesu ba aimoruk esensiál. Uainhira inklui mós indikadór tolu ne’e, indise kobertura bele aumenta, maibé sei nafatin menus husi 100%. Iha ambitu paizes membrus OMS Rejiaun Sudueste Aziátiku, Timor-Leste ninia indise kobertura maka ki’ik-liu, kompara ho, pur ezemplu ida a’as-liu hanesan Tailándia ho 77%, ka Myanmar ho Bangladesh ne’ebé iha respetivamente 51% ho 50%.

Sasukat ida seluk ba Kobertura Universál Saude maka, protesaun finanseira. Husi pontu de vista jenériku, despeza ba saúde iha Timor-Leste, husi tinan 2002 to’o 2017, varia entre 2,41 % to’o 3, 65% husi PIB5, no 90% husi despeza hirak ne’e mai husi setor públiku. Aspetu protesaun finansiera normalmente sukat liuhusi indikadór rua: Primeiru, maka indikadór emprobresimentu, ka ‘’sai ki’ak’’ tanba tenke hasai osan husi bolsu rasik, hodi kobre despeza ne’ebé relasiona ho kuidadus saúde. Iha Timor-Leste, despeza ne’ebé tenke hasai husi bolsu rasik, kompara ho total despeza ba saúde (dadus tinan 2017) maka 8,35%. Dadus ne’ebé iha relasiona ho 2015 hatudu katak 1%, ka mais ou menos 12 mil pesoas maka sai ki’ak, ka empobrese, tanba tenke hasai osan husi bolsu rasik ba kuidadus saúde. Segundu maka indikadór ba despeza katastrófika ba saúde, ka despeza ne’ebé ema tenke halo liuhusi 10%.

Iha Timor-Leste, 2,9% husi populasaun maka tenke halo despeza katastrófika, hodi bele hetan/ka uainhira hetan asesu ba kuidadus saúde. Iha kasu espesifiku tuberkuloze, pur ezemplu, 80% husi pasiente ne’ebé diagnostikadu tuberkuloze, tenke liuhusi esperiénsia despeza katastrofika maiz oumenus 83%, relasiona no ninia diagnóstiku no tratamentu. Kustu ida ne’e, a’as-liu hotu iha mundu laran tomak, no relasiona ho (1) lakon rendimentu hamutuk 41%, (2) nesesidade suplementu nutritivu hamutuk 38%, no (3) kustu deslokasaun/viajem hamutuk 14%.

Ita seidauk hatene, implikasaun ba despeza katastrofika ne’ebé epidemia moras la hadaet hamosu dadaun no sei hamosu tan, iha ita nia sosiedade. Despeza katastrofika hira maka ema ida ho stroke, diabetes, kankro, ipertensaun ka vitima asidente tráfiku tenke halo? Ema hira maka sai ki´ak/sei sai ki’ak tanba despeza katastrofika hirak ne’e?

Informasaun hirak ne’e hatudu, iha sorin ida katak, Maske protesaun finanseira di’ak tebes, tanba 90% despeza ba saúde mai husi finansiamentu públiku, fenómenu empobresimentu, tanba tenke hasai osan husi bolsu rasik, hodi bele hetan kuidadu saúde, no fenómenu despeza katastrófika, hahú mosu nu’udar realidade konkreta, no sai mós barreira ba asesu ba kuidadus saúde. Iha sorin seluk, indise kobertura ba kuidadus saúde esensiais hatudu katak metade husi populasaun iha Timor-Leste maka seidauk hetan kobertura ba kuidadus essensiais saúde nian.

Asesu ba kuidadu saúde iha Timor-Leste

Hanesan ita haree tiha ona iha leten, Kobertura Universál Saude, atinjivel (ka bele de´it atinji) uainhira kuidadu saúde asesível fizikamente, finanseiramente mós asesível, no hetan aseitasaun husi utilizadór sira. Iha kazu Timor-Leste nian, peskiza ne’ebé matenek na´in sira halo,6 (inklui Timor oan na´in rua, Sra Ana Isabel Soares PhD, vise-ministra iha VI Governu Konstitusionál, no Dr João Soares Martins, PhD, Vise-Ministru iha Segundu Governu Tranzisaun UNTAET no eis-Dekanu Fakuldade Medisina no siensias Saúde, UNTL) hatudu katak: primeiru, iha barreira fizika ka geografika. Asesu transporte ba pasiente, sai problema tranversal importante tebes, atu populasaun iha Timor-Leste bele asesu ba servisus ospitálares. Sem transporte asesivel, populasaun barak maka na´in rasik hulan sira nia moras, ka aluga karreta privadu, ho sira nia osan rasik, ka prefere hela iha uma de´it. Fraze lapidar ne’ebé autór peskiza sira uza hanesan parte husi títulu ba artigu akadémiku, ne’ebé sira publika iha 2016, reflete di’ak tebes oin-sa populasaun ninia atitude iha aspetu ida ne’e. Fraze ne’e maka : ‘’Ha´u ba, ha´u mate, ha´u hela mós ha´u mate. Di’ak liu, ha´u hela no mate iha ha´u nia uma’’.

Segundu, fatór seluk ne’ebé sai barreira ba komunidade atu uza servisus ospitais nian maka, barreira finanseira. Inklui iha ne’e osan adisionál ne’ebé sira tenke hasai rasik husi bolsu, ba ema ne’ebé, pur ezemplu, halo doasaun ran, ba akomodasaun no hahán ba pasiente no ninia familia ne’ebé akompaña, no ba mós lori fila mate-isin ba uma. Terseiru, la iha aseitabilidade di’ak kona-ba efetividade atendimentu, hanesan purezemplu, persesaun husi komunidade relasiona ho attitude profisionál saúde, ne’ebé fo’o impresaun kona-ba ezisténsia nepotismu iha atendimentu (hetan atendimentu lais no di’ak, uainhira iha maluk, ka koñese sira ruma iha ospitál, ka koñese ema bo’ot ruma), no mós atitude profisionais saúde kona-ba ijiene, ka kondisaun no estatutu social pasiente sira nian.

Iha peskiza ida fali, ne’ebé publika iha tinan 2018, matenek na´in sira, inklui Timor oan sira ne’ebé ohin temi tiha ona, buka atu entende diak liu tan nivel utilizasaun kuidadu saúde iha Timor-Leste, inklui mós fatór sira ne’ebé produz/provoka utilizasaun ne’e. Peskiza ne’e hatudu katak ‘’nesesidade’’ sai fatór determinante ne’ebe dudu komunidade atu utiliza kuidadus primarius no mos kuidadus ospitálares, maibé uma-kain sira iha área rural, ladún ba ospitál, kompara ho uma-kain iha áreas urbanas. Husi uma-kain 1712 ne’ebé partisipa iha peskiza ida ne’e, iha tinan 2014, 14% de´it husi respondente maka hateten katak sira uza servisu saúde iha tinan anterior ba tinan ne’ebé hala’o peskiza, 4,8% de´it maka usa servisu ospitál nian, no 12,5% de´it maka usa kuidadus primarius saúde, iha fulan anterior ba loron peskiza. Ida ne’e hatudu utilizasaun ne’ebé ki’i tebes, kompara ho ‘’nesesidade’’ ne’ebé iha. Maske peskiza ida ne’e la buka identifika barreira ba utulizasaun kuidadus saúde, asesibilidade geográfika, no finanseira, no mos aseitabilidade, sai nafatin fatór ne’ebé bele kontribui ba ‘hamenus’ utilizasaun. Peskiza ne’e mós konklui katak, Maske kuidadu saúde gratuitu, komunidade seidauk utiliza másimu, no rekursus finanseirus publikus ne’ebé aloka ba saúde, benefisia liu ema riku do que ema ki’ak.

Konkluzaun no Rekomendasaun

Informasaun husi peskiza rua ne’e, konfirma indiretamente dadus kona-ba indise kobertura servisu, ne’ebé OMS publika iha tinan 2018. Ka, dehan ho lia fuan seluk, Kobertura Universál Saúde iha Timor Leste  seidauk másimu, tanba problema ne’ebé Timor-Leste enfrenta iha asesibilidade fizika/geografika, asesibilidade finanseira, no aseitabilidade ba atendimentu kuidadus saúde.

Haree ba evidénsia hirak ne’ebé temi tiha ona, sa ida maka ita presiza, no bele halo, atu mellora asesu, hodi nune’e konsegue atinji Kobertura Universál Saúde, nu’udar alvo ida ba ODS númeru 3, iha tinan 2030? Ha´u hanoin nai uun sira ne’ebé simu responsabilidade atu foti desizaun, no atu diriji sistema nasionál saúde iha Timor-Leste, hatene ona sa ida maka atu halo. Maske nune’e, permiti ha´u temi bua balun hanesan tuir mai ne’e:

Primeiru, iha nesesidade urjenti atu halo adekuasaun ba forma, ka oin-sá ita halo prestasaun kuidadus saúde, liu-liu iha área kuidadus primarius saúde. Iha sorin ida, moras la hadaet sai ona realidade inegável iha ita nia sosiedade, hodi hamosu todan bo’ot liu tan, ba sistema saúde, tanba buat ne’ebé koñesidu ho ‘’double burden of disease’’, ka ko-ezisténsia husi moras da’et, no moras ne’ebé la hada’et. Iha sorin seluk, kapasidade finanseira no kapasidade rekursus umanus ne’ebé ohin disponivel ba Timor-Leste, bele permite ita atu lori kuidadus primarius saúde, ba uma-kain ida-idak, hodi nune’e bele hamenus barreira fizika/geografika, barreira finaseira, no mós aumenta aseitabilidade husi komunidade, ba prestasaun kuidadus saúde.

Segundu, atu bele komplementa prestasaun kuidadus primárius, ho baze ba familia, kuidadus primárius hirak ne’e, tenke mós espande ba fatin sira seluk ne’ebé halibur ema, no ema gasta tempu signifikante husi sira nia moris, hanesan eskola sira, liuhusi programa saúde eskolár. Família no eskola maka sai knu’uk hodi hamosu ábitus la saúdavel, ne’ebé hafoin sai risku ba moras la hadaet sira hanesan ipertesaun, diabetes no kankro; familia no eskola maka sai knu’uk hodi hadaet moras ba mai, hanesan tuberkulose, ho mos moras hadaet seluk tan; familia ho eskola maka sai knu’uk ba ambiente la saudavel, ne’ebé kontribui ba kontinuidade husi moras da’et, no mós moras la hada’et. Modelu prestasaun saúde ne’ebé hatu’ur-a’an de´it iha fasilidade saúde, sei la ajuda sistema saúde iha Timor-Leste, atu ultrapasa dezafiu ba asesu no utilizasaun kuidadus saúde. Prestasaun kuidadus primárius iha familia, eskola no fasilidade saúde sira, tenke sai eixu atuasaun foun, husi esforsu tomak atu aumenta assesibilidade ba kuidadus saúde iha Timor-Leste.

Terseiru, presiza iha parseria renovada ida entre servisu nasionál saúde ho komunidade iha Timor-Leste laran tomak, hodi bele ultrapasa barreira ba asesu ne’ebé identifika ona liu-husi peskizas akadémikas ne’ebé iha. Hakat primeiru ba ida ne’e tenke mai husi servisu nasionál saúde rasik, hodi bele muda aseitabilidade negativa ne’ebé komunidade iha, relasiona ho prestasaun saúde. Atu ida ne’e bele akontese, presiza iha rigor liu-tan iha definisaun politikas/policy ho baze ba evidénsia, presiza iha seriedade liu-tan, iha etapa hotu-hotu planeamentu no jestaun ba rekursus umanus, finanseirus no lojistikus, 7 no presiza iha komunikasaun estratéjika, hodi bele disemina ho transparénsia esforsu genuinu ne’ebé servisu nasionál saúde hala’o iha aspetu hirak ne’e. Hakat tuir fali, maka mobiliza no organiza sosiedade liuhusi koordenasaun intersetorál ne’ebé di’ak, ho autóridade relevante sira hotu, ho objetivu prinsipál atu garante katak komunidade ho nia lider sira, konsiente kona-ba sira nia direitu atu hetan kuidadus saúde, no kona-ba sira nia dever atu kolabora no partisipa iha rezolusaun ba dezafiu hirak ne’ebé relasiona ho asesu ba kuidadus saúde.

Hein katak hanoin hirak ne’e, bele kontribui ba esforsu atu hadia asesu, utilizasaun no kobertura ba kuidadus saúde iha Timor-Leste, hodi nune’e, Kobertura Universál Saúde bele sai realidade iha Rai Doben ida ne’e. Ita hein mós katak, iha tinan balun tan, komunidade rasik maka sei buka profisionál saúde sira, hodi hateten: ‘’Ha´u hela, ha´u mate. Ha´u bá, ha´u sei moris. Di’ak liu ha´u ba, hodi bele moris naruk liu tan, no hodi bele hadok-a’an lai husi ‘aldeia bá-la-fila’’’!

 -Fim-

Notísia relevante ba artigu ne´e:MS Lansa Livru Estratejia Finansiamentu Saúde 2019-2023

Referénsia:

  1. Evans, D. B. et all (2013): Universal health coverage and universal access. https://www.who.int/bulletin/volumes/91/8/13-125450.pdf . Asesu iha 21 Jullu 2019
  2. http://www.scielo.br/scielo.php?pid=S1413- 81232018000601763&script=sci_arttext&tlng=en. Asesu iha 21 Jullu 2019.
  3. Intervensaun iha Fórum Finansiamentu Saúde, 8 Novembru 2019. 2 Giovanella, L. et all (2018): Universal health system and universal health coverage: assumptions and strategies.
  4. Price, J.A. et al (2016): https://bmchealthservres.biomedcentral.com/articles/10.1186/s12913-016-1762-2. Asesu 21 Jullu 2019. 7 Guiness, L. et all (2018): Determinants of health care utilization: the case of Timor-Leste. https://academic.oup.com/inthealth/article/10/6/412/5051851 . Asesu iha 21 Jullu 2019.
  5. WHO (20017): Timor-Leste Health Financing Profile. http://www.searo.who.int/timorleste/publications/health-financing-profile-2017-timorleste.pdf. Asesu iha 21 Jullu 2019.
  6. WHO (2018): 2018 Health SGD Profile: Timor-Leste. https://apps.who.int/iris/bitstream/handle/10665/276845/sdg-profile-TimorLesteeng.pdf?sequence=5&isAllowed=y&ua=1, asesu iha 21 Jullu 2019.

HAKEREK NO HATÁN

Please enter your comment!
Please enter your name here