Administradór Postu Iliomár, João Baptista Roas. Imajen/Nelson de Sousa

ILIOMÁR, 19 novembru 2019 (TATOI)- Postu Administrativu Iliomár iha potensialidade ba setór agrikultura, liuliu natar  tanba  ho ninia luan kuaze ektare 200-resin, maibé seidauk iha sistema irrigasaun hodi fornese bee ba agrikultór sira.

Natar ho ektare refere lokaliza iha area Irabere, Fahebere, Aboko ho Asadere, maibé volume bee mak menus atu bele fornese ba natar sira ne’e. tanba ne’e presiza duni irrigasaun hodi akumula bee , atu nune’e, to’o tempu bailoron naruk bele iha nafatin bee rezerva hodi sustenta natar sira.

 “Durante ne’e agrikultór sira halo hela natar, maibé  sei hasoru problema irrigasaun tanba durante ne’e uza sistema manuál,” hateten Administradór Postu Administrativu Iliomár, João Baptista Roas, ohin, ba TATOLI iha Iliomár, Munisípiu Lautem.

Nia tenik tan, família  agrikultór  uma-kain 100-resin maka sempre halo natar iha tempu udan, maibé bai-loron paradu tanba laiha bee atu fornese ba natar.

Administradór ne’e fó sasin katak, bee matan Irabere sufisiente atu fornese ba povu agrikultór sira bainhira Governu liuhosi Ministériu Agrikultura no Peska (MAP) konstroi ona irrigasaun.

“Poténsia boot iha ne’e mak natar, maibé  governu presiza apoiu kria sistema irrigasaun ida di’ak. Ha’u fiar katak natar sira ne’e hotu hele fó produsaun foos ba komunidade,” nia tenik.

Aleinde ne’e, Lideransa Postu Administrativu ne’e husu ba Governu atu fó tulun mós tratór ba agrikultór sira hodi halo natar.

“Iha Governu anteriór  fó apoiu tratór haat ka lima iha ne’e,  maibé agora avaria hotu ona  tanba laiha manutensaun,” nia hateten.

Postu Administrativu Iliomár ho ninia luan 302,17 Kilo-metru kuadradu ho ninia total populasaun 10.976 hosi família uma-kain 2.132 ne’ebé maioria moris ho vida agrikultór.

Iliomár iha Suku neen kompostu hosi Aliebere, Caenliu, Fuat, Iliomár Ida, Iliomár Rua, ho Trilolo.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here