Ró Haksolok. Imajen dok. ZEESM

DILI, 19 novembru 2019 (TATOLI) – Relasiona ho kazu Ró Haksolok ne’ebé daudaun ne’e mosu hela polémika iha públiku nia leet, Prezidente Rejiaun Admistrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), José Luís Guterres ‘Lugu’, informa ohin loron ikus ba Governu Timor-Leste hodi hato’o resposta ba Tribunál Coimbra.

Ró Haksolok ho kustu millaun €13,7, inaugura iha loron 26 maiu 2017 iha sidade Figueira da Foz, Portugal no tuir informasaun sei to’o Timor-Leste iha outubru 2017, maibé tanba problema internál husi kompañia Atlantic Eagle Ship Building ho sub-kontratór maka to’o agora ró seidauk mai. Ró ne’e rasik iha kapasidade atu tula ema na’in-377 no karreta hamutuk 15.

“Kona-ba Ró Haksolok nian, ohin loron ikus liu ona no ami ohin mós liu hosi Ministru Estadu Prezidensia Konsellu Ministru, Hermenegildo Augusto Cabral Pereira, hodi fó resposta ba proposta ne’ebé mai hosi Tribunál Coimbra, atu hatete katak Timor-Leste prontu atu ajuda revitalizasaun empreza ne’ebé atu halo Ró mai ita ne’e ka lae”, tenik Lugu iha Palásiu Governu, tersa ne’e.

Notísia Relevante: PM Delega Ministru Hermenegildo Akompaña Kazu Ró Haksolok

Nune’e mós, Prezidente RAEOA hasoru malu ona ho advogadu nasaun rua, nune’e bele bele husu hanaruk tan tempu hafoin foti desizaun ba proposta ne’ebé iha.

“Ohin ami ko’alia didi’ak ona hodi husu tan tempu uitoan tanba ami mós foin ba (RAEOA) atu nune’e bele estuda didi’ak lai prosesu sira ne’e hafoin hola desizaun ruma. Tanba desizaun ne’ebé atu hola labele iha kustu adisionál ba ita nia Estadu”, akresenta Lugu.

Entretantu, prosesu kontrusaun Ró Haksolok ninia kontratu asina iha 2014 entre Governu no empreza portugués. Konstrusaun ró ne’e konsege paradu maibé bainhira estabelese ZEESM, prosesu kontrusaun ró-ahí ne’e entrega ba Autoridade mak responsabiliza.

Entretantu, Ferry Ró Haksolok, desizaun atu hili ninia estaleiru (fatin atu harii ró) hahú no foti husi V Governo Konstitusionál ne’ebé lidera Kay Rala Xanana Gusmão nu’udar Primeiru-Ministru, tuir ninia reprezentasaun husi Ministru Transporte no Komunikasaun, Pedro Lay da Silva, ne’ebé selebra kontratu ho estaleiro Atlantic Eagle Ship Building,Lda (Atlanticeagle) iha loron 22 setembru 2014.

RAEOA-ZEESM simu prosesu konstrusaun ró liuhosi transferénsia projetu no alokasaun orsamentu husi Governu Timor-Leste ba Autoridade RAEOA-ZEESM hodi transfere poder no alokasaun verba ne’ebé akontese liu tiha akordu entre Governu no EstaleiruAtlantic Eagle no liu estaleiru hodi hahú harii ró.

Hodi garante implementasaun tuir espesifikasaun no padraun tékniku ba Ferry Ró Haksolok no assegura katak ró ne’e bele hetan rejistu internasional (Registo Internacional de Navios da Madeira em Portugal) tuir rekezitu Governu Timor-Leste, RAEOA-ZEESM selebra kontratu supervizaun ba konstrusaun ferry ho Instituto de Soldadura e Qualidade (ISQ), ne’ebé hanesan instituisaun ho esperiénsia liu tinan 50 ho konstrusaun ne’ebé kredensiál atu fiskaliza konstrusaun.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here