Atuasaun iha palku husi Grupu Coral Nossa Senhora do Carmo (NSC) Catedral Díli.

DILI, 19 novembru 2019 (TATOLI)—Atu bele hametin liután lasu amizade entre Igreja Timor-Leste no Igreja Indonézia, Grupu Coral Nossa Senhora do Carmo (NSC) Catedral Díli hatán konvite husi komisaun organizadora hodi reprezenta Timor-Leste ba partisipa Festival Paduan Suara Gerejawi Indonesia-Timor-Leste (FESPARAWI) 2019 iha zona fronteira nian ne’ebé realiza iha Atambua, Kupaun, Indonézia,

Grupu Coral Nossa Senhora do Carmo (NSC) Catedral Díli (feto).

Kompetisaun ka FESPARAWI ne’ebé realiza husi Kementrian Pariwisata dan Ekonomi Kreatif Republik Indonesia (Ministériu Turizmu no Ekonomia Kreativu Repúblika Indonézia) ne’e, Maestro do Coral NSC Catedral, Joanico “Ninho Virgo” Mendonça de Araújo hatutan, ida ne’e hanesan oportunidade dahuluk coro husi Igreja Timor-Leste partisipa Festival Coral iha estranjeiru.

Grupu Coral Nossa Senhora do Carmo (NSC) Catedral Díli (mane)

“Ami Grupu Coral Nossa Senhora do Carmo Catedral Díli sente orgullu tebes. Ne’e hanesan oportunidade dahuluk coro husi igreja Timor-Leste festival coral iha estranjeiru ho objetivu atu hametin lasu amizade entre ingreja TL no igreja Indonézia. Iha festivál ne’e, ami-nia grupu tama ba faze finál ne’ebé sei realiza iha 23 novembru,” dehan Joanico “Ninho Virgo” de Araújo ba Ajénsia TATOLI liuhusi entrevista via rede sosiál, tersa (19/11/2019).

Iha festivál ne’e, nia hatutan, múzika ne’ebé aprezenta iha festivál ka komunikasaun ne’e ne’ebé kada grupu coral tenke hananu mak múzika obrigatóriu “Persaudaraan yang Rukun” no múzika eskollida “Ita Tama Lai”.

“Múzika eskollida ho dalen tetun ne’e, ho objetivu atu promove mós ita Timor-Leste nia dalen ba mundu (internasionál),” nia dehan.

Nia haktuir, sira eleitu husi grupu coral hamutuk 17 ne’ebé tuir festivál ne’e ne’ebé kompete iha faze eliminasaun ne’ebé raliza iha 18-19 novembru 2019. Grupu coral husi Timor-Leste, nia informa, ne’ebé tuir festivál ne’e hamutuk grupu hitu (7) husi Dili, Maliana, no Oé-Cusse.

“Grupu corál ne’ebe tama husi Timor-Leste hamutuk grupu hitu (7). Grupu ida mak elimina tiha no ami grupu neen (6) seluk tama ba faze finál. Grupu Corál husi Timor-Leste ne’e mak grupu rua (2) husi Maliana, grupu rua (2) husi Oé-Cusse, no grupu tolu (3) husi Dili,” nia informa.

Antes tuir FESPARAWI iha Indonézia, nia haklaken, Grupu Coral Nossa Senhora do Carmo Catedral (NSCC) Díli partisipa ona iha kompetisaun grupu corál ne’ebé realiza husi parte igreja no instituisaun sira seluk iha Dili, Timor-Leste.

“Iha Kompetisaun Corál Natal 2013, ami hetan terseiru lugar. Kompetisaun Coral Aniversáriu Bank Mandiri ba dala-27 (2015), ami hetan primeiru lugar. Kompetisaun Coral Komemorasaun 12 de Novembru 2017, ami hetan terseiru lugar. Kompetisaun Coral União Europeia 2019. Ami hetan terseiru lugar.

Kompetisaun Komemorasaun Aniversáriu ALMAMOR, ami hetan primeiru lugar no manan tasa rotativa. Hein katak, iha final ne’ebé raliza iha Plaza Atambua ne’e, hein katak ami bele sai kampiaun,” nia dehan.

Entretantu, Maestro do Coral NSCC ne’e informa, tuir planu iha 2020 ninia grupu coral sei tuir Kompetisaun Festival Choir Internacional iha Italia ne’ebé sei realiza iha 17-19 Setembru 2020.

“Ne’e konfirmadu ona. Tanba, ami simu ona konvite ba dala tolu (3). Agora, ami hein atu buka osan atu bele ba partisipa lori nasaun Timor-Leste nia naran. Ami hein Estadu no Governu Timor-Leste ka timoroan tomak sei bele apóia ami,” dehan Maestro do Coral, Joanico “Ninho Virgo” Mendonça de Jesus, ho esperansa be nakonu.

Jornalista: Cancio Ximenes
Editór      : Rafy Belo

HAKEREK NO HATÁN

Please enter your comment!
Please enter your name here