Xapa matríkula. Imajen espesiál

DILI, 19 novembru 2019 (TATOLI) – Diretora Empreza Caicobilari, Genoveva Fátima Araújo Amaral, relata empreza prodús ona xapa matríkula hamutuk 10.148, iha 4 novembru no entrega ona ba Diresaun Nasionál Transporte Terrestre (DNTT).

“Ami hatama ona 10.148 no haruka ona ba parte lojístika DNTT nian, maske kontratu ba xapa matríkula hamutuk 20.684“, dehan nia ba Ajénsia Tatoli via telefónika, ohin.

Diretora rekoñese katak durante ne’e nia kompañia hetan problema iha enkomenda alumíniu hosi Indonézia, nune’e hodi difikulta produsaun ba xapa matríkula, maibé iha inísiu novembru materiál sira konsege tama mai, nune’e iha 4 novembru, empreza konsege prodús xapa matríkula ba karreta no motorizada.

Nune’e empreza halo ona produsaun ba xapa matríkula atinje ona porsentu 50 no garante katak sei finaliza iha 30 novembru 2019.

“Foin daudaun materiál ba produsaun xapa matríkula maka la tarde, entaun ami bele finaliza iha 20 ka 22 novembru maibé tarde iha order, entaun ami sei finaliza iha 30 novembru”, dehan nia.

Nune’e mós, Xefe Deparatmentu rejistu veíkulu hosi DNTT, Nelson Martins, admite katak husi DNTT simu ona xapa matríkula hosi Empreza Caicobilari, maibé DNTT labele emite ba motorista sira, tanba hothotu hein prosesu produsaun hotu maka foin atribui dala ida.

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here