Prezidente Repúblika (PR), Francisco Guterres Lú Olo, simu audiénsia Embaixadór Brunei Darussalam iha Timor-Leste, Adnan Bin Haji M. Jaafar, iha Palásiu Prezidente Nicolau Lobato, Bairru Pité. Imajen Mídia PR

DILI, 18 novembru 2019 (TATOLI)–Prezidente Repúblika (PR), Francisco Guterres Lú Olo, hala’o enkontru ho Embaixadór Brunei Darussalam iha Timor-Leste, Adnan Bin Haji M. Jaafar, iha Palásiu Prezidente Nicolau Lobato, Bairru Pité,  Dili, ohin.

Komunikadu ne’ebé TATOLI asesu husi Mídia Prezidénsia Repúblika hateten iha inísiu soru-mutuk ne’e, embaixadór Adnan hato’o saudasaun husi Liurai Brunei Darussalam ba Xefe Estadu no mós ba povu Timor-Leste ne’ebé iha loron-28 novembru fulan ne’e sei selebra loron Proklamasaun Independénsia ba dala-44.

Iha okaziaun ne’e mós, Embaixadór Adnan Bin Haji M. Jaafar relata kooperasaun sira-ne’ebé nasaun rua hala’o no iha posibilidade atu hala’o iha futuru, hanesan iha área edukasaun, saúde, obra públika no iha área transporte aéro.

Iha área edukasaun, Brunei kompromete sei kontinua fó bolsu estudu ba timoroan sira hodi hasai kursu mestradu iha jestaun konstrusaun, ne’ebé foka liubá parseria públiku privadu.

Relasiona ho área saúde no obra públika, Embaixadór Brunei Darussalam haktuir iha ona koordenasaun atu realiza vizita estudu entre ofisiál nasaun rua no ko’alia kona-ba transporte aéro, Brunei Airlines, oras ne’e, halo hela estudu viabilidade hodi haree posibilidade semo mai Timor-Leste.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here