Membro Deputado KHUNTO, António Verdial De Sousa. Imajen/Tatoli.

DILI, 18 novembru 2019 (TATOLI) – Deputadu Bankada Kmanek Haburas Unidade Nasionál Timoroan (KHUNTO), Antonio Verdial de Sousa, hateten bainhira mosu remodelasaun ba VIII Governu konstitusionál, Konselleru Másimu Partidu, José dos Santos Naimori Bukar maka sei deside kuadru KHUNTO sira ne’ebé maka integra iha VIII Governu Konstitusionál.

“Ko’alia kona-ba remodelasaun buat hotu hosi ami KHUNTO, iha Maun-Boot Naimori Bukar nia liman. La’os ami deputadu na’in-lima iha Parlamentu ninia liman”, tenik Verdial iha Parlamentu Nasionál, segunda ne’e.

Deputadu Bankada Governu ne’e ko’alia asuntu Remodelasaun, relasiona ho Konferénsia daruak Koligasaun Partidária Aliansa Mudansa ba Progresu (AMP) iha sábadu (16/11), ne’ebé hasai Rezolusaun númeru 2/2019, iha pontu hitu, AMP konsidera bainhira iha nosaun atu halo remodelasaun ba VIII Governu Konstitusionál hodi responde ba nesesidade dezenvolvimentu nasaun, liuliu kontribui atu hadi’a dezempeñu Governu.

Tuir nia, AMP iha instrumentu polítiku hanesan CNRT, PLP no KHUNTO, maibé parte KHUNTO nia kuadru partidu sira inklui deputadu na’in-lima fó konfiansa tomak ba Konselleru Naimori.

“Ami KHUNTO komandu mai hosi ida de’it. Ida ne’e la’os signifika laiha demokrasia maibé Konselleru Superiór maka iha direitu tomak atu deside”, nia dehan tan.

Deputadu ne’e refere oituan kona-ba rezultadu ezekusaun ezekusaun Orsamentu Jerál Estadu 2019, enkuantu tinan 2020 nian sa’e ba biliaun $1,950.

“Orsamentu 2020 boot tebes. Ida-ne’e ha’u atu husu de’it ho haraik-aan ba membru Governu sira, tenke sukat-aan katak ha’u bele ka lae atu ezekuta maibé ida ne’e kompeténsia orgaun soberania datoluk iha nasaun ne’e”, Deputadu ne’e salienta.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here