Prezidente Tribunál Rekursu, Deolindo dos Santos. Imajen Tatoli/Egas Cristovão

DILI, 18 novembru 2019 (TATOLI) – Daudaun ne’e Juís sira iha Tribunál Distritál Baucau, Oé-Cusse, no Suai kontinua enfrenta difikuldade kona-ba rezidénsia atu hela, tanba ne’e Prezidente Tribunál Rekursu (PTR) Deolindo dos Santos hato’o preokupasaun ne’e durante enkontru ho Prezidente Repúblika (PR) Francisco Guterres Lú Olo.

“Hato’o ba Prezidente Repúblika kona-ba difikuldade ne’ebé Tribunál hasoru atu bele halo previzaun orsamentu ba tinan 2020 nian, ne’ebé parte Tribunál hato’o ona ba Governu no konkorda ona. Sei lori ba Parlamentu Nasionál atu bele diskute nune’e bele ultrapasa hela situasaun balun ne’ebé Tribunál rasik hasoru maka sei iha problema ho rezidénsia ba Juís sira nian iha Baucau, Oé-Cusse, no Suai”, tenik PTR iha Palásiu Prezidensiál, Bairru Pité, segunda ne’e.

Notísia Relevante: TR Husu Adisionál Millaun $5-resin iha OJE 2020

Tuir Deolindo, Tribunál mós tenta atu bele fó solusaun iha orsamentu tinan oin liuhosi implementa projetu sira, ho esperasa katak tinan 2021, Tribunál sira bele iha ona kondisaun atu bele fasilita di’ak liután Juís sira ninia servisu.

Problema hanesan, ne’ebé mak PTR hato’o ba Xefe Estadu kona-ba oinsá atu harii tan Tribunál tanba iha fatin balun laiha duni kondisaun atu fasilita Juís sira hodi hala’o servisu liuliu iha Tribunál Distritál Díli (TDD) nian, ho ninia orsamentu ne’ebé aprova ona no prosesu mós la’o ona to’o faze finál.

“Bainhira laiha impedimentu ruma ha’u garante sei konkretiza projetu ne’e iha tempu badak”, nia akresenta.

Notísia Relevante: CNA Konklui Ona Aprovizionamentu ba Edifísiu Foun TDD

Iha pakote Orsamentu Jerál Estadu (OJE) tinan fiskál 2020, Tribunal Rekursu (TR) husu tan adisionál millaun $5-resin atu aloka ba konstrusaun Edifísiu TDD ho mós rezidénsia ba Juíz sira.

Jornalista: Cipriano Colo

Editór: Xisto Freitas

 

HAKEREK NO HATÁN

Please enter your comment!
Please enter your name here