Prezidente Tribunál Rekursu, Deolindo dos Santos. Imajen/Tatoli

DILI, 18 novembru 2019 (TATOLI)–Prezidente Tribunál Rekursu (TR), Deolindo dos Santos, atualiza prosesu formasaun juíz na’in-lima iha Protugál ba Prezidente Repúblika, Francisco Guterres Lú Olo, segunda ne’e, iha Palásiu Prezidente Nicolau Lobato, Bairru Pité, Dili.

Hafoin enkontru, Deolindo hateten, juíz na’in-lima ne’ebé tuir hela formasaun iha Portugál durante fulan-neen, fulan tolu tuir formasaun teórika ne’ebé sei ramata iha dezembru tinan ne’e no fulan tolu seluk hala’o estájiu iha Tribunál sira.

“Hato’o ba Prezidente Repúblika kona-ba evolusaun formasaun ba juíz sira iha Portugál, ne’ebé mak oras ne’e la’o hela. Prezidente Repúblika mós hatene kona-ba ida-ne’e”, Deolindo relata.

Nia dehan tan, kona-ba estájiu, juíz na’in-lima sei fahe ba Tribunál ida-idak atu bele iha koñesimentu di’ak liután.

“Sei haruka sira halo estájiu dook malu, atu moris hamutuk ho komunidade no ema sira-ne’ebé ko’alia lian Portugés di’ak, nune’e sira bele aprofunda koñesimentu”, nia haktuir.

Entretantu, juíz na’in-lima ne’e mak hanesan Argentino Luísa Nunes, Hugo Pui, Zumiati Maria Freitas, Francisca Márques Cabral no Zulmira Maria Auxiliadora Barros da Silva

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here