Diretór Nasionál Asuntu Konsulár no Komunidade Timorense-MNEK,  Célio Fátima Sebastião Vanudo Moniz da Silva. Imajen: Nelia Fernandes

DILI, 18 novembru 2019 (TATOLI)-Ministériu Negosiu Estranjeiru no Kooperasaun (MNEK), Diresaun Konsolár realiza enkontru ho Imigrasaun no SEPFOPE (Sekretáriu Estadu Formasaun Profisionál no Empregu) hodi ko’alia kona-ba dezafiu serbisu instituisaun nian ne’ebé durante ne’e hasoru.

“Agora daudauk ita haree lei imigrasaun; iha lei tuan no lei foun, lei imigrasaun 2003 ita sei kaer nafatin no lei foun 2007 ita ka’er. Ne’ebé, ida ne’e halo konfuzasaun uitoan ba ami-nia serbisu loroloron nian, ami atu haree ba lei ida ne’ebé los, lei foun ka tuan?” dehan Diretór Nasionál Asuntu Konsulár no Komunidade Timorense-MNEK,  Célio Fátima Sebastião Vanudo Moniz da Silva ba Ajénsia TATOLI, iha edifísiu MNEK, Praia dos Coqueiros Dili, ohin.

“Ami de’it dúvida ona tanbá ita la hatene lei ida ne’ebé atu uza, sá tan públiku sira, ema estranjeiru sira ne’ebé aplika lei, ho hanoin ida ne’e maka ohin konvida SEPFOPE, Imigrasaun mai tur hamutuk hotu bele hasai nia hanoin atu bele rezolve, se ita uza lei tuan uza lei tuan, se ita uza lei foun uza lei foun,” katak Diretór Célio Moniz.

Nia informa, durante serbisu ne’e bazeia hela ba lei tuan, lei númeru 9/2003, depois migrasaun uza lei foun iha parte impostu. “Agora ho Diretór Jerál imigrasaun foun sira komesa implementa halai ba vistu nian no ba vistu ninian ne’e hanesan Negosiu Estranjeiru, ami-nia ministériu ami sente ami la iha informasaun husi imigrasaun”.

Nia konsidera, migrasaun halo buat ne’e la informa maibé sira hatene MNEK hanesan odamatan.

“Agora migrasaun halo buat sira ne’e la informa estranjeiru, sira mai husu ita-nia misaun sira rai li´ur la hatene, ne’e mak ami presiza informasaun klaru, informasaun ne’ebé imigrasaun hasai bele fó hatene mai para ami mós bele transmite fali ba rai li´ur ba ita-nia misaun sira transmite fali ba estranjeiru, embaixadór sira iha Timór sira bele hatene”.

Diretór Nasionál Asuntu Konsulár no Komunidade Timorense-MNEK, Célio Fátima Sebastião Vanudo Moniz esplika, ho lei foun, lei ida ne’ebé mak Prezidente da Repúblika promulga ona, iha 24 maiu 2017 númeru 11, lei imigrasaun. “Lei foun ne’e imigrasaun sira hakarak implementa ona maibé realidade ita seidauk iha fasilidade atu implementa tanba ne’e mak ami diskute daudaun atu bele reforsa ona obstaklu ne’ebé ita hasoru”.

Iha parte seluk, Diretór Célio Fátima Sebastião Vanudo Moniz da Silva hateten, imigrasaun hateten atu monta sistema iha ita-nia nasaun iha rai li´ur hanesan konsolár Bali, Kupang, Sidney, Darwin, atu monta sistema iha embaixada balun maibé dehan iha fevereiru nia laran 2020. Maibé, tuir nia, sistema ne’e seidauk monta, ema sira tama mai uza nafatin lei tuan, ema mai ho visa turista no balun hakarak serbisu, sira visa turista prolonga hodi aplika fali ba vistu traballu”.

“Lei foun ne’e hakarak, sei lei foun ne’e imlementa ona, sira tama mai to’o iha área portu no iha fronteira sira ne’e tau kedas ona vistu traballu ida ne’e mak lei foun nia hakarak maibé ita-nia kondisaun seidauk permite, seidauk iha instalasaun iha sistema iha ita-nia fronteira, iha misaun, ita-nia embaixada ida ne’e seidauk iha, ida ne’e mak halo ami dúvidas, ne’e mak ami bolu malu halo buka dalan oinsá rezolve”.

Nia informa tan katak, iha enkontru ne’e deside ona katak sei la’o hela ho lei hanesan agora daudauk ne’e hodi buka mekanizmu oinsa atu bele responde lei foun nia obstaklu sira.

“Iha próximu enkontru tuir mai la´ós de’it husi SEFOPE, Imigrasaun no MNEK maibé ami sei konvida mós, Trade Investe, SERVE, Ministériu Finansa sira hotu bele hato’o sira-nia ideia ka hanoin atu bele rezolve lei foun ninia implementasaun,” nia akresenta.

Jornalista : Nelia Fernandes

Editór         : Rafy Belo

1 KOMENTÁRIU

  1. Caro Sr. Director husi Lina Ministerial

    Hau pesoal sente katak servisu lina interministerial hanesan MNEK, SEPFOPE, Servisu Migrasaun, Server no Ministerio relevante seluk importante tebes. Sujere atu fahe informasaun ba malu, espesifikamentu lei no ninia implementasaun lei ne’e rasik. Inkontru ida ne’e persija no nesesario halo ho regulamentu hodi nune’e bele iha informasaun klaru entre Ministerial sira, hamutuk hodi asegura movimentu maluk estranjeiru iha Timor, liu-liu ba pesoal estranjeiru ne’ebe mak mai visita iha Timor. Sira nia visita tenki klaru no ho objetivu tuir lei Timor. Ida seluk MNEK hanesan odamatan boot hodi asegura movimentu sira ne’e halo koperasaun diak ho Servisu Migrasaun.

    Obrigado barak

HAKEREK NO HATÁN

Please enter your comment!
Please enter your name here