Serimónia abertura treinamentu kombate Inséndiu iha Salaun Xina, Palásiu Prezidensiál, Bairru Pité. Imajen Mídia PR

DILI, 18 novembru 2019 (TATOLI)–Xefe Kaza Sivíl, Francisco Maria de Vasconcelos, akompaña husi Xefe Kaza Militár, Koronél António da Silva “Mau Kalo” no Sekretáriu Estadu Pretesaun Sívil, Alexandrino de Araújo, hala’o abertura ba treinamentu kombate inséndiu ne’ebé realiza husi Kaza Militár Prezidénsia Repúblika. 

Tuir komunikadu ne’ebé TATOLI asesu husi Mídia Prezidénsia Repúblika, ohin, haktuir, iha intervensaun, Xefe Kaza Sivíl husu atu partisipante sira bele aproveita oportunidade hodi aprende no bele kria komunikasaun di’ak, nune’e bele fasilita asaun sira hodi kombate inséndiu iha futuru.

Iha sorin seluk, Xefe Kaza Militár, Koronél António da Silva “Mau Kalo” esplika, atividade ne’e, hanesan parte husi planu Kaza Militár nian no nia fó hanoin, Kaza Militár nia papél atu fó apoiu ba Prezidente Repúblika hala’o nia knaar nu’udar Komandante Supremu Forsa Armada.

Iha ámbitu defeza no seguransa, Kaza Militár mós halo seguransa ba pesoál Prezidente Repúblika ho familia inklui edifísiu, nune’e nia mós husu ba partisipante treinamentu inséndiu atu aprende ho di’ak.

Enkuantu, Sekretáriu Estadu Protesaun Sivíl hateten ba partisipante sira kona-ba vertente tolu importante iha “seguransa integradu” tuir Lei Seguransa Nasionál mak hanesan: Defeza Nasionál (knaar F-FDTL), Seguransa Interna (knaar PNTL) no Protesaun Sivíl.

Formasaun inséndiu sei hala’o durante loron 16 iha Palásiu Prezidente Nicolau Lobato, Dili, hahú loron 18 novembru 2019 ho matéria ne’ebé sei fó mak hanesan, formasaun iha kombate inséndiu urbana, primeiru Intervensaun kontra inséndiu, primeiru sokoru, resgatu no salvamentu no ikusliu mak prátika.

Totál partisipante iha formasaun ne’e hamutuk ema na’in 31 husi Kaza Militár no treinadór sira ba formasaun mai husi Protesaun Sivíl no Bombeiru.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here