HNGV. Foto google

DILI,18 novembru 2019 (TATOLI)-Durante agostu, setembru no outubru, tuir dadus reseita nian, reseita Ospitál Nasionál Guido Valadares (HNGV) hamutuk dólar 53. 719 (rihun lima nolu resin tolu, atus hitu sanolu resin sia).

Diretór Administrasaun Finansa no Lojístika, HNGV, Duarte Marçal Araújo. Imajen: Felicidade Ximenes

“Fulan agostu reseita hamutuk dólar 18.44, setembru iha 16.600 no mós iha fulan outubru dólar 18.679. Entaun ita dehan iha fulan tolu liu ba ne’e totál hamutuk dólar 53.719,” relata Diretór Administrasaun Finansa no Lojístika, Duarte Marçal Araújo ba jornalista sira, iha nia kna’ar fatin HNGV, ohin.

Nia informa, reseita ne’ebé ita hetan iha HNGV ne’e husi fulan tolu mak husi laboratóriu, aluga fatin matan, fatin partus, liu-liu ba ema estranjeiru ne’ebé halo operasaun, raiu-x,emerjénsia husi banku urjenjia, sirurjia, no VIP (Very Important Person).

Hanesan mós estudante sira ne’ebé atu mai prátika husi ISC (Instituto Superior Cristál, ICS (Instituto Ciênsia da Saúde) no mós husi UNITAL (Universidade Oriental Timor-Lorosa’e) sira ne’ebé mai prátika mós selu. Osan hirak ne’e hatama hotu ba kofre estadu atu uitoan ka barak hatama ba kofre. “Ita dehan zero toleránsia ida ne’e mak maneira aprosimasaun ne’ebé mak ita halo no hetan kobransa sira ne’e hodi hatama fali ba kofre estadu nian”.

Kria Sistema Transparante

Husi reseita sira, tuir  Diretór Administrasaun Finansa no Lojístika, Duarte Marçal Araújo, husi reseita sira ne´e , reseita husi VIP mak barak liu kada fulan, hamutuk rihun sia.

Tinan oin iha ona planu atu aumenta tan VIP iha HNGV ne’ebé hanaran VVIP ne’e ba ita nia Membru Governu sira ne’ebé mak moras ne’e mós selu nafatin para orsamentu hirak ne’e ita tau iha kofre estadu.

“Maibé ha’u hakarak ba tinan oin kria sistema ida ne’ebé di’ak liu. Ha’u mós sei ko’alia ho Ministériu Finansa liuliu parte reseita nian atu kria sistema ne’ebé transparante para ema hotu hatene liuliu ba sira ne’ebé kliente, liuhusi kria notas ruma hanesan iha bill katak bill ne’e ema ne’ebé mai selu iha ospitál ne’e tenke iha resivu ne’e iha hotu”.

“Kalan ka loron atu selu tenke selu hotu dadersan ha’u haruka tezoreira ba foti osan ho bill ne’e para ema hotu-hotu iha koñesimentu ba reseita ida ne’e hodi asegura ba Timór. Ha’u atu dehan Ospitál Nasionál Guido Valadares ne’ebé osan hotu-hotu ne’ebé selu ne’e ita dehan zero toleránsia, sentavus ida sei la tau iha ospitál maibé sei tau hotu ba kofre estadu hanesan ema ne’ebé atu mai prátika iha HNGV mós osan ne’e tau iha kofre estadu,” nia esplika.

Diretór Administrasaun Finansa no Lojístika, Duarte Marçal Araújo hateten, hanesan timoroan ne’ebé atu selu iha VIP, sira ne’ebé selu ba kalan ida ne’ebé sira atu toba maibé kona-ba ai-moruk hodi halo tratamentu ne’e la selu maibé ba fali ema estranjeiru sira ne’e hotu-hotu tenke selu ita nia kobransa ho nasaun sira seluk la hanesan tanba nasaun sira seluk kuandu halo operasaun boot ruma ezemplu kabun sira ne’e ema loke sai hotu ne’e ita selu rihun ba rihun maibé ita timoroan iha HNGV ne’e ita selu mak atus rua limanulu de’it.

Ita mós bazeia ba lei, bazeia ba orientasaun husi na´in ulun sira saida mak ospitál halo ne’e atu selu uitoan ka barak, osan hirak ne’e tau iha kofre estadu osan hirak ne’e tau iha ne’ebá hodi sustenta nasaun.

“Ami iha HNGV Ami mós halo ona sistema ida liu-liu iha administarsaun finansa no lojístika sistema tenke trasparánsia tanba reseita iha HNGV barak la’ós iha VIP de’it,” nia haktuir.

“Iha tinan-2020 ha’u hakarak dezeña bill ne’e tenke aprovasaun husi Ministériu Finansa, parte reseita nian. Ha’u atu distribui ba ha’u-nia funsionariu sira hodi distribui ba enfermaria sira para kalan se mak selu kalan karik tau hamutuk dader mak mai hatama iha parte finansa no lori mós reseita maibé nota sira ne’e kliente sira mak tenke hetan orijinál,” nia garante.

“Dahuluk haruka sira mai para diretór finansa tenkie hatene para reseita ne’e sira mós hatene no resivu ne’ebé iha banku ne’e tenke hanesan,” nia reforsa tan.

Ba Timoroan, tuir Diretór Administrasaun Finansa no Lojístika, Duarte Marçal Araújo, konsulta iha HNGV atu buka hatene moras mós tenke selu hanesan maibé ba estranjeiru selu la hanesan ho timoroan.

Agora kona-ba tratamentu de’it ita Timór ho estranjeiru la hanesan. Ita sidadaun bazeia ba lei, ita labele selu maibe interna iha sala VIP ne’e tenke selu kama ne’e; kalan ida dólar tolunulu resin-lima maibé estranjeiru mós hanesan nafatin ho dolar tolunulu resin-lima, ai-moruk sona, ai-moruk hemu atu hasai raiu-X ne’e tenke selu hotu maibe ba timoroan la selu maibé selu de’it ba VIP kama ho interna ne’e.

“Maibé hanesan ezemplu atu ba halo karta kondusaun ne’e tenke selu hanesan selu dólar ida no sasán sira ne’e la hanesan ba ita timoroan tau konsiderasaun katak ita ho osan ne’e uitoan maibé ba ema estranjeiru osan ne’ebé boot,” nia kompara.

Notísia relevante:HNGV Hakarak Estabelese Tan Kuartu VVIP Haat

Jornalista :Felicudade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here