Xefe Suku Assumanu, Bernardino Martins. Imajen/Tatoli Egas Cristovao

LIQUIÇÁ, 16 novembru 2019 (TATOLI) – Autoridade Komunitária iha Munisípiu Liquiça, propoin ba Governu atu kria planu ba estrada iha área rurál sira.

Xefe Suku Assumanu, Bernardino Martins, hateten tempu to’o ona Governu kria planu ba estrada rurál, tanba populasaun barak liu hela iha baze.

“Tempu to’o ona governu tau iha planu kona-ba estrada rurál sira, liuliu estrada suku ida liga ba suku seluk, tanba durante ne’e komunidade halerik ba estrada ne’e tinan barak ona”, Xefe Suku Assumanu ko’alia ba Ajénsia Tatoli, iha Administrasaun Munisipál Liquiçá, sesta ne’e.

Xefe Suku Assumanu ne’e mós lamenta ho projetu estrada balun iha Liquiçá, ne’ebé tempu bailoro taka de’it ho rai, maibé tempu udan lakon hotu.

“Ne’e ita bele dehan estrada temporáriu, ne’ebé to’o udan nia lakon tiha, udan boot estrada ne’e tenke lakon hotu”, nia hateten.

Xefe Suku ne’e aprezenta ona kondisaun estrada hosi parte Assumanu nian ba ba autoridade munisipál maibé to’o oras ne’e seidauk iha desizaun.

“Agora ita apenas aprezenta, tanba ita iha difikuldades ruma iha baze, maibé desizaun iha sira-nia liman”, informa Xefe Suku Assumanu.

Iha parte seluk, Xefe Aldeia Kaimegoluli, Suku Leotala, Postu Administrativu Liquiçá Vila, Hermenegildo da Conçeição dos Santos, husu Governu tau importánsia ba estrada tanba kondisaun ladi’ak fó impaktu ba buat barak.

Lee mós : Komunidade Husu Governu Fó Prioridade ba Estrada Rurál

“Kuandu ita-nia komunidade ruma moras atu lori bá ospitál kleur tanba kondisaun estrada, komunidade tenke la’o-ain bá fa’an sira-nia produtu lokál iha merkadu, tanba movimentu transporte publiku iha área rurál laiha”, dehan nia.

Tuir Monografia 2018 nian, Munisípiu Liquiçá iha Postu Administrativu tolu, hanesan Liquiçá vila, Bazartete no Maubara ho suku 23, aldeia 134. Munisípiu Liquiçá ho ninia luan 550,950, totál família iha 15,820, mane 38,431, feto 39,000. Totál populasaun hamutuk 77,431.

Postu Administrativu Liquiçá Vila iha suku hitu (7) mak hanesan Dato, Loidahar, Hatuquessi, Darulete, Leotela, Aço-Manu no Lukulai. Postu refere iha aldeia 39, família 5,019, mane 11,910, feto 12,230. Totál hamutuk 24,140, postu ne’e nia luan 98,58km2.

Purtantu Postu Administrativu Bazartete iha suku sia (9) hanesan Tibar, Ulmera, Mota Ulun, Lauhata, Maumeta, Metagou, Fahi Lebo, Leorema no Fatumasse. Postu ne’e iha aldeia 45, família 5,971, mane 15,156, feto 15,260 no totál hamutuk 30,416, postu ne’e nia luan área 187,53km2.

Entretantu Postu Administrativu Maubara iha suku hitu (7) hanesan Vatuvou, Vatuboro, Guicho, Gugeleur, Maubara Lisa, Lissadila no Vaviquinia. Postu Maubara iha aldeia 50 no família na’in 4,830, mane 11,365, feto 11,510 no totál hamutuk 22,875, postu ne’e ninia luan área 264,84km2.

Tuir observasaun ekipa Ajénsia Tatoli nian iha munisípiu Liquiçá, suku ne’ebé ho kondisaun estrada di’ak liu iha Liquiçá mak Metagou (Bazartete).

Lee mós : Bee, Estrada no Eletrisidade sai Prioridade MOP Nian iha 2020

Purtantu parte Liquiçá Vila, estrada diresaun Loidahar liga ba área Dato nian katak tinan-tinan sempre lori rai henek mak taka, maibé udan monu rai estrada sira ne’e lakon hotu.

Nune’e mós parte suku Dato Foho liga ba Suku Darulete, Leotela, Assumanu no Hatuquessi kondisaun estrada ladi’ak. Hosi parte estrada suku Assumanu liga suku Leorema kondisaun estrada aat tebes.

Hosi parte Maubara nian, hanesan suku Vatuboro, Guicho no Lissadila maioria estrada ho kondisaun aat.

Notísia relevante : Kompañia 48 Hahú Mobiliza Materiál Hodi Konstrui Estrada 

Jornalista : Evaristo Soares Martins
Editora : Maria Auxiliadora

HAKEREK NO HATÁN

Please enter your comment!
Please enter your name here