Sentru Formasaun Nicolau Lobato nia área ortikultura no florikultura. Imajen/Egas Cristovão.

BAZARTETE, 16 novembru 2019 (TATOLI) — Atividade ortikultura no florikultura iha Sentru Formasaun Nicolau Lobato (CFNL, sigla portugés) mai ho nia motto “Se ema bele tansá ita labele” ne’ebé nia orientasaun atu ema hotu iha Leorema no fatin seluk aprende ortikultura no florikultura.

Sentru Formasaun ne’ebé lokaliza iha área Ekapu, Suku Leorema, Postu Administrativu Bazartete, Munisípiu Liquiçá, harii hosi Luis Lobato iha 2013 ne’e ho misaun importante ida mak hakarak kore ema hosi dependénsia ekonómika no tenke sai ezemplu ba ema hotu-hotu.

Orientasaun importante mak semente planta (pembibitan), kuda (penanaman) no fa’an (penjualan) maka fó sustentabilidade ba CFNL, loron-loron tenke halo buat foun, loron-loron tenke hadi’a nafatin, loron-loron tenke aprende nafatin.

Forsadór Centro Formação Nicolau Lobato, Longuinhos Saldanha. Imajen/Tatoli Egas Cristovao.

Mensajen hosi Sentru Formasaun ne’e ba traballadór sira “Keta haluha ó-nia devér, tanba nia maka asegura ó-nia direitu”.

Sentru Formasaun Nicolau Lobato mai ho vizaun, osan mós bele hetan hosi rai-maran, la’ós de’it hosi tasi/mina-rai, ou ikan iha tasi-laran, nune’e mós hosi funsionáriu públiku. Tanba ne’e agrikultura setór importante ne’ebé bele haburas, hadi’a ekonomia ema hotu-hotu nian liuliu komunidade ne’ebé hela iha área remota.

Modalidade bázika la’ós osan, maibé tenke iha koñesimentu mínimu, hatene, hakarak no gosta halo buat foun liuhosi servisu hanesan ke’e-rai, hamoos rai no kuda buat ruma. Servisu grupu/kooperativa hanesan xave no susesu ba atividade agrikultura. Ortikultura no florikultura hanesan atividade ne’ebé ema hotu-hotu bele halo nomoos hanesan alternativa solusaun ba juventude ka ema hotu ne’ebé la hatene lee no hakerek.

Ortikultura no florikultura bele kompleta paizajen turístiku ne’ebé furak iha fatin ne’ebé de’it. Ortikultura no florikultura hamosu kriatividade no lori mensajen inovativu no sustentavel.

Misaun mak haburas atividade ortikultura no florikultura liuhosi kuda modo, ai-fuan no ai-funan. Garantia ba kuantidade no kualidade produsaun atu hadau-malu iha merkadu. Tama teknolojia moderna iha programa ortikultura no florikultura. Motiva no muda mentalidade ema-nian atu sai badinas, disiplina, serbisu hamutuk, ajuda malu no aprende buat foun nune’e hamoris sentimentu inovadór no motivadór.

Atividade ortikultura parte hosi agronomia, maibé diferensa ho agronomia, ortikultura foka liu ba papél kultivasaun iha tipu ai-horis hanesan ai-fuan, ai-funan no vegetál. Hosi atividade ortikultura iha planta tolu (tolu) mak hanesan planta frutífera, planta vegetál no planta ornamentál.

Koordenadór Jerál interinu atuál Forsadór CFNL, Longuinhos Saldanha, esplika planta frutífera mak saburaka, aple, rambutan, manga no kulu; planta vegetál mak bayam, kól no tomate; planta ornamentál (tanaman hias) mak ai-funan roza (mawar), urkídea (anggrek) no calatheas.

Purtantu florikultura (tanaman hias) ho tipu oioin, rozas, krisen, elbra, pikok, antoriun, toriun baruda no tagoda. Ai-funan iha Sentru Formasaun Nicolau Lobato, Leorema ne’e ho modelu 12.

“Iha ne’e liga ba ai-funan barak tebes, hanesan ai-funan jardín, ne’e prepara distribui ba salaun Delta Nova, ne’e depende ba pedidu hosi salaun Delta Nova. Iha ne’e ai-funan krisan, mawar, elbra iha oioin, mean, mutin no kinur, pikok mós iha kór oioin. Ami haruka tún bá 1000 tangkai, mínimu 500 tangkai ba Delta Nova, mas ai-funan mawar barak liu”, Forsadór CFNL, Longuinhos Saldanha ba Ajénsia Tatoli iha Leorema, sesta ne’e.

Ai-funan rozas. Imajen/Egas Cristovão.

Nia esplika, prosesu kuda ai-funan rozas, dahuluk tenke prepara uluk fundasaun lokál durante loron 90 hafoin muda ba kantreiru, lori fali fulan lima halo kultivasaun. Prosesu kuda ai-funan sira seluk mós hanesan depende ba instrusaun ne’ebé prepara ba ai-funan.

“Ba oin komesa hapara ona suku sira seluk nia prezensa iha ne’e, iha ne’e só Leorema de’it mak serbisu iha ne’e”, dehan Longuinhos.

Oras ne’e ema ne’ebé serbisu iha CFNL iha ema na’in-ualu de’it, maibé rekruta komunidade sira bazeia ba nesesidade bainhira sentru presiza. Kona-ba rekrutamentu hosi komunidade, kada loron-ida fó dólar 3, tanba Leorema iha aldeia 10, entaun kada aldeia ida rekruta ema na’in-rua. Sentru formasaun ne’e ho ektare 13, fatin ne’e iha aldeia Fatuneru nian.

Sentru Formasaun ne’e mós simu estájiu hosi fatin seluk, iha área ortikultura no florikultura. “Ami sempre halo akompañamentu estajiáriu sira hodi esplika ba sira kona-ba ai-funan hirak ne’e”, katak.

Nia dehan, formandu balun hosi sentru formasaun oras ne’e ba loke ona ortikultura iha Ermera, Maliana no balun iha Liquiçá, Maubara nian.

Entretantu, Sentru Formasaun Empregu Profisionál Tibar (CFEPT, sigla portugés) liuhosi Unidade Produsaun Demonstrasaun Agronomia (UPDA) haruka mós joven na’in-rua estájiu profisionál iha CFNL, Leorema.

Formandu Sérgio Gonçalves Mendes. Imajen/Egas Cristovão.

Formandu Sérgio Gonçalves Mendes, hateten iha Tibar aprende kona-ba ortikultura, maibé bá iha Leorema koko aprende liubá iha área florikultura nian.

“Agora ha’u hetan estájiu profisionál iha fatin ida ne’e, ami aprende maka espesífiku rozas sira ne’e, ami aprende barak iha ne’e mak florikultura de’it”, katak nia.

Sérgio Gonçalves Mendes hosi Sentru Formasaun Tibar, sei hala’o estájiu durante fulan lima no oras ne’e kompleta ona fulan ida, sei hela fulan haat.

Sentru formasaun dezde 2013 to’o oras ne’e prodús formandu atus-ida-resin ona.

Jornalista : Evaristo Soares Martins
Editora : Maria Auxiliadora

HAKEREK NO HATÁN

Please enter your comment!
Please enter your name here