RTTL,EP Lansa tan programa foun ho naran Fantastik. Sábadu (16/11/2019). Imajen TATOLI/Antónia Gusmão.

DILI, 16 novembru 2019 (TATOLI) – Radio Televizaun Timor-Leste, Empreza Públika (RTTL,EP) lansa tan programa foun ho naran Fantastik.

Prezidente RTTL, Francisco da Silva Gari, hateten programa ne’e realiza atu promove talentu joven sira ni’an no promove produto lokál.

“Kalan ida ne’e, ita bele mai halibur iha fatin ne’e tanba lansa tan programa ida ho naran Fantastik ho objetivu hakarak atu anima, diverte povu Timor-Leste liuliu sira iha Dili, no mós fó oportunidade ba foin-sa’e sira para bele aprezenta sira-nia talentu durante ne’e iha no fó korazen ba foin-sa’e sira seluk”, hateten Francisco da Silva Gari bainhira lansa programa Fantastik iha resintu RTTL, EP, ohin.

Francisco Gari husu ba partisipante sira hothotu bele utiliza didi’ak oportunidade ne’e hodi mellora koñesimenti di’ak liután.

Iha programa ne’e sei realiza fulan ida dala rua iha sábado, ne’ebé partisipa hosi negosiante sira ne’ebé maka lori sira-nia produtu fa’an iha resintu RTTL,EP nian hamutuk baraka (stand) 15.

Biban ne’e líder másimu Radio Televizaun Timor-Leste ne’e agradese no hato’o obrigado ba patrosinadór prinsipál Sekretáriu Estadu Kooperativa, nune’e mós ba Planet Printing, Lita Galeri.

Iha lansamentu ne’e, anima hosi banda múzika timoroan sira no artista famozu Maria Vitória (Marvi).

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here