Prezidente CI, Virgílio da Silva Guterres, entrega sertifikadu ba jornalista TAFARA.TL, Virginia da Silva Reinata P. Rodrigues. Imajen/Florencio Miranda Ximenes.

DILI, 16 novembru 2019 (TATOLI) – Prezidente Konsellu Impresa (CI, sigla portugés), Virgílio da Silva Guterres, husu ba instituisaun mídia sira iha Timor-Leste atu fó importánsia ba kobre asuntu no efeitu husi mudansa klimátika hodi hasa’e konxiénsia ba sidadaun atu hadomi ambiente.

“Ha’u fó parabéns ba jornalista sira ne’ebé durante loron haat tuir formasaun. Ha’u husu atu mídia sira fó importánsia ba kobre asuntu ambiente no efeitu husi mudansa klimátika atu ita-nia sidadaun sira hatene hodi hadomi ambiente”, Prezidente CI afirma iha ámbitu enserra no sertifika formandu ba treinamentu “Media and Climate Change” iha salaun Asosiasaun HAK, Faról, ohin.

Virgílio Guterres sente kontente formasaun husi Asosiasaun Jornalista Timor-Leste (AJTL) no husu atu kontinua kapasita jornalista timoroan sira.

Mídia presiza fó importansia tanba mudansa Klimátika afeita ema nia vida liuliu iha setór agrikiltura no saúde inklui setór seluk.

“Ita-nia esperansa mak oinsá Governu kontinua kria polítika hodi mudansa klimátika labele afeta maka’as liu ba sidadaun sira”, katak.

Iha fatin hanesan, Prezidente AJTL, David Hugo, espera liuhusi formasaun ne’e jornalista sira bele iha koñesimentu atu fó importásia ba kobre asuntu ambiente no efeitu ba mudansa klimátika hodi informa no eduka ema hotu atu hadomi ambiente.

“Espera katak ita-boot sira bele hetan koñesimentu hodi halo kobertura maka’as liu ba ambiente”, katak.

AJTL sei esforsu hodi kontinua fó formasaun no advokasia ba jornalista iha área oioin hodi profisionaliza jornalista sira.

Jornalista TAFARA. TL, Virgina Reinata. P Rodriques, dehan kontente bainhira hetan formasaun tanba aprende buat barak hodi buka hakarek notísia atu eduka sidadaun sira atubele hadomi ambiente.

Entretantu, Jornalista G-RTV, Tetónio Alves Pinto, dehan durante treinamentu loron haat ne’e hetan esperiénsia lubuk ida atubele kobre asuntu ambiente.

“Ita bele kobre asuntu ambiente hodi fó informasaun ba ema hotu katak la hadomi ambiente sei la moris ho saudavel, ne’ebé presiza konxiénsia hodi labele so’e lixu arbiru”, nia garante.

Treinamentu ne’e hahú 13 to’o 16 novembru ho materia espesífika mak hasa’e koñesimentu ba jornalista sira bele komprende previzaun tempu, iklima no kontribuisaun umana ba mudansa klimátika no efeitu sira.

Asosiasaun Jornalista Timor Leste (AJTL) hamutuk ho United Nations, Educational, Scientific and Cultural Organization (UNESCO) sertifika ona jornalista 20 husi instituisaun média online, imprime, eletróniku no universitáriu sira.

Notísia relevante :  AJTL-UNESCO Forma Jornalista Hodi Kobre Asuntu Mudansa Klimátika

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here