Sekretáriu Jerál Partidu CNRT, Francisco Kalbuadi Lay. Imajen dok. TATOLI

TIBAR, 16 novembru 2019 (TATOLI)—Koordenadór Jerál Meza Konferénsia Daruak Aliansa Mudansa ba Progresu (AMP), Francisco Kalbuadi Lay hateten Primeiru-Ministru (PM), Taur Matan Ruak, atribui ona kna’ar ba Ministra Finansa, Sara Lobo Brites no Parlamentu Nasionál (PN) atu halo redusaun ba orsamentu jerál Estadu (OJE) 2020 ho montante biliaun $1.950 ne’e.

“Agora, Primeiru-Ministru, Taur Matan Ruak, hamutuk ho Diretiva Nasionál fó ona kna’ar ne’e tomak ba iha Ministra Finansa ho Parlamentu Nasionál inklui xefe bankada no xefe komisaun sira, atu haree no hadi’a ho didi’ak”, nia dehan ba jornalista sira iha Tibar, Postu Administrativu Bazartete, Munisípiu Liquiçá, ohin.

Nia esplika katak redusaun ne’e sei hala’o liuhusi diskusaun iha Parlamentu Nasionál. “Klaru, sei iha redusaun ba OJE. Sira sei lori bá no sei diskute lai iha loron hirak nia laran iha Parlamentu Nasionál”, nia salienta.

Lee mós: Deputadu CNRT Deklara Vota Kontra Kuandu La Redúz Proposta OJE 2020

Kalbuadi informa hotu-hotu presiza diskute ho kakutak malirin atu rezulta orsamentu ida-ne’ebé mak razoável liu no koloka rúbrika OJE tuir lei.

Entretantu, iha rezolusaun númeru 2/2019 konferénsia nasionál AMP, rezulta pontu ualu importante no iha pontu tolu hateten kata AMP endosa planu asaun anuál no orsamentu ba tinan 2020, ne’ebé mak aprezenta husi portavóz AMP, nu’udár mós Primeiru-Ministru Governu Daualuk ho observánsia ba, primeiru, komentáriu no sujestaun ne’ebé aprezenta ona husi kada responsável komisaun parlamentár (Komisaun A to’o G)  ba kada setór /liña ministeriál inklui nosaun atu halo hikas ezersísiu hodi redús montante orsamentu jerál Estadu 2020.

Segundu, kustamentu ba planu asaun anuál inklui define méta anuál nian tenke aprezenta duni husi instituisaun estadu/liña ministeriál sira rasik.

Terseiru, assegura kontinuidade no melloramentu sistema planeamentu no orsamentu 2020 ne’ebé orientadu ba rezultadu, iha ne’ebé aliñadu ho programa tinan lima Governu Daualuk, inklui aliñamentu ho liña orientasaun jerál ne’ebé aprezenta no endosa ona iha konferénsia nasionál daualuk AMP nian.

Antes ne’e, Deputadu Bankada CNRT, Domingos de Carvalho, hateten montante orsamentu 2020 tenke hanesan ho 2019 nian, ne’ebé hafoin reapresiasaun no halo redusaun millaun $650, montante ikus ne’ebé hetan promulgasaun husi Prezidente Repúblika, Francisco Guterres ‘Lú Olo’ maka biliaun $1,482.

Nia subliña, Proposta OJE 2020 tenke iha padraun ida katak to’o biliaun $1,3 ka biliaun $1,4, nune’e labele liu Rendimentu Sustentável Estimadu (RSE).

Entretantu, iha fulan kotuk, Governu liuhosi Konsellu-Ministru aprova proposta orsamentu 2020 ho montante biliaun $1.950. Hosi montante orsamentu ne’e fahe ba kategoria saláriu no vensimentu millaun $241,271, bens no serbisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here