Sekretáriu Estadu Juventude no Desportu, Nélio Isaac Sarmento. Imajen Tatoli/António Gonçalves

TIBAR, 16 novembru 2019 (TATOLI)–Sekretáriu Estadu Juventude no Desportu, Nélio Isaac Sarmento hateten konstrusaun ba Estádiu Munisipál Dili nia prosesu administrativu sala kedas iha inísiu, nune’e mak mosu problema to’o ohin loron.

“Estádiu Munisipál Dili hosi inísiu kedas nia prosesu administrasaun sala tanba antigu Sekretáriu Estadu Juventude no Desportu propoin ba kompañia atu halo tribun ida tan iha parte leste ninian. Tribun ida-ne’e la tama iha orijinál kontratu,” Nélio ba Agência Tatoli iha Tibar, Postu Administrativu Bazartete, Munisípiu Liquiçá, sábadu ne’e.

Nia hatutan, tribun ne’ebé la tama iha orijinál kontratu hanesan tribun komplementár ida-ne’ebé dono projetu husu atu kompleta.

“Bainhira dono projetu ne’e deside atu halo komplementu ida ba tribun ida leste ninian ne’e lori ba Konsellu Administrasaun Fundu Infraestrutura (CAFI-sigla Portugés). Entaun, CAFI deside bele harii tribun ho orsamentu montante hanesan ne’e. Depois CAFI deside tiha ita la halo mudansa ba iha kontratu orijinál no kompañia mós husik tiha obra orijinál ninian ne’e nia foku liu fali ba ida adisionál ne’e. Entaun, tribun hosi orsamentu adisionál ne’e hotu ona maibé obra seidauk la’o pursentu 100,” nia haktuir.

Tanba ne’e, Nélio hatutan, Governu husu atu halo investigasaun hodi buka problema iha ne’ebé no ikus deteta katak iha prosesu inísiu mak mosu fallansu uitoan maibé kompañia konsege konklui adisionál.

“Tan ne’e mak Governu nia obrigasaun atu selu uluk lai projetu adisionál ne’e. Maibé, to’o ikus prosesu investigasaun hatudu katak entermu finanseiru mós kompañia laiha no prosesu husi Inspesaun Jerál hatudu katak tenke hapara kompañia ne’e atu bele loke fali prosesu foun,” governante ne’e tenik.

Maibé, tuir nia, bainhira atu hapara kompañia, Governu mós tenke iha rekizitu balun liuliu parte dono projetu tenke halo levantamentu diretamente ida ba terrenu atu haree sasán saida mak kompañia halo ona iha ne’ebá no ekipamentu saida mak nia hatama. Nune’e, Governu tenke konta ho totál hirak ne’e hotu hodi bele selu.

“Ita sei loke fali ho prosesu foun ba kompañia ne’ebé mak hakarak atu kaer fali. Kontinua mós ho orsamentu ne’ebé iha ne’e atu konklui Estádiu ne’e,” Nélio haklaken.

Entretantu, prosesu konstrusaun ba estádiu refere Governu fó ba Marino Interprise iha 2015 hodi halo rehabilitasaun ho osan millaun $1.5. Maibé, kompañia la konsege finaliza tanba entende sala kontratu to’o ikus mosu dezintendimentu entre kompañia ho Governu. Maski nune’e, Governu konsege selu ona pursentu 70 ba obra ne’ebé kompañia ne’e konstrui ona.

Tanba obra ne’e atrazadu, Governu foti desizaun entrega ba parte Inspesaun Jerál hodi halo investigasaun no rezultadu inspesaun ne’e hatudu katak kompañia refere labele ona atu kontinua kaer obra ne’e.

Governu liuhosi reuniaun ordinária ho Konsellu Administrasaun Fundu Infraestrutura deside hapara kompañia nia atividade (konstrusaun estádiu) iha loron hirak liubá.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here