Ambiente konferénsia nasionál daruak AMP iha salaun Sentru Formasaun Tibar. Imajen mídia CNRT

TIBAR, 16 novembru 2019 (TATOLI)–Durante konferénsia daruak Aliansa Mudansa ba Progressu (AMP), ne’ebé hala’o iha salaun Sentru Formasaun Tibar, Postu Administrativu Bazartete, Munisípiu Liquiçá, sábadu ne’e, diskute mós kona-ba asuntu lista kandidatu membru Governu na’in sia  (9) ne’ebé to’o oras ne’e Prezidente Repúblika, Francisco Guterres Lú Olo seidauk fó pose.

“Kestaun ida-ne’e iha diskusaun balun kestiona, maibé ami bele komprende hamutuk katak situasaun mak ida-ne’e, buka meiu nafatin, tanba rai ne’e ema hotu nian no ida-ne’e sei iha solusaun. Ami entrega tomak ba ami-nia líder na’in tolu, mak hanesan Kay Rala Xanana Gusmão, Taur Matan Ruak no José dos Santos Naimori Bukar, atu haree solusaun saida mak atu hadi’a iha futuru. Ha’u hateten dala barak ona no sira hotu mós laiha ida mak konkorda atu troka”, Koordenadór Jerál Meza Konferénsia Daruak AMP, Francisco Kalbuadi Lay hateten lia hirak ne’e liuhusi konferénsia imprensa.

Entretantu, iha rezolusaun númeru 2/2019 konferénsia nasionál AMP, rezulta pontu ualu importante no iha pontu daruak nian hateten, AMP observa katak membru Governu ne’ebé seidauk kompletu kontinua lori prejuizu ba implementasaun programa Governu Daualuk, inklui afeta ba planu asaun anuál no ezekusaun orsamentu anuál. Tanba ne’e, solisita Primeiru-Ministru, Taur Matan Ruak, halo nafatin komunikasaun ho Prezidente Repúblika hodi assegura tomada pose ba membru Governu indijitadu sira.

AMP mós husu Prezidente Repúblika justifika formalmente ‘por escrita’ nia pozisaun kona-ba membru polítiku sira ne’ebé indijitadu, no bainira laiha solusaun ba membru Governu indijitadu sira, AMP sei la halo diálogu ho kualker entidade no personalidade polítika.

Entretantu, membru governu  indijitadu ne’ebé Xefe Estadu seidauk fó pose mak hanesan Ministru Finansa, Helder Lopez, Ministru Turizmu, Komérsiu no Indústria, Francisco Kalbuadi Lay, Minstru Asuntu Kombatente no Libertasaun Nasionál, Virgílio Smith, Ministru Saúde, Sérgio Lobo, Ministru Interiór (deklara rezigna-aan ona), António Verdial, Vise-Ministru Justisa, Amandio Benevides, Vise-Ministru Negósiu Estranjeiru no Kooperasaun, José Turquel.

Enkuantu, Ministru Planeamentu no Investimentu Estratéjiku, Samuel Marçal ho Ministru Petróleu no Rekursu Minerál, Alfredo Pires, PR aseita fó pose, maibé kandidatu na’in-rua ne’e lakohi tanba hakarak fó solidariedade ba kandidatu membru governu nain-hitu seluk.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here