Prezidente Komisaun D ne’ebé trata Asuntu Ekonomia no Dezenvolvimentu, Virgínia Ana Belo. Imajen/Cipriano Colo

TIBAR, 16 novembru 2019 (TATOLI) – Iha Proposta Orsamentu Jerál Estadu (OJE) 2020 ba Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), laiha alokasaun ba kategoria kapitál menór no kapitál dezenvolvimentu.

Nune’e alokasaun orsamentu ba kategoria seluk atu atende de’it ba servisu operasionál rekurente.

Totál Proposta Orsamentu 2020 ne’ebé prevee ba RAEOA-ZEESM hamutuk millaun $26, kompostu hosi kategoria saláriu no vensimentu millaun $8,818 (%33,8), bens no servisu millaun $14,483 (%55,5) no transferénsia públika millaun $2,783 (%10,7).

Notísia Relevante: Arsénio Rekoñese Ezekusaun Orsamentu RAEOA Defísil Tanba Transferénsia Tarde

Prezidente Komisaun D ne’ebé trata Asuntu Ekonomia no Dezenvolvimentu, Virgínia Ana Belo, haktuir bazeia ba esplikasaun husi Autoridade RAEOA-ZEESM sesante iha audisaun konjunta Komisaun C,D,E no F, iha Proposta OJE 2020 ba rejiaun espesiál ne’e laiha duni alokasaun ba kategoria rua, tanba ne’e Komisaun C ne’ebé trata Asuntu Finansa Públika, konfirma ona ho parte Gabinete Primeiru-Ministru atu haree ba asuntu ne’e.

“Governu Sentrál iha hela hanoin ida maibé tanba akontese ona tranzisaun, nune’e ita husik lai no lalika fó lai osan. Ita sei haree Prezidente Autoridade foun atu trasa ninia planu”, tenik Deputada Virgínia ba Agência Tatoli iha Sentru Formasaun Tibar, sábadu ne’e.

Deputada Bankada CNRT ne’e hatutan: “Dalaruma Governu Sentrál sei haree tanba autoridade sei iha saldo. Saldo ne’ebé ho ninia montante rungu-ranga”.

Iha tinan fiskál 2019, Governu Sentrál aloka orsamentu millaun $76 ba konta Autoridade RAEOA-ZEESM, maibé transferénsia tama tarde tanba orsamentu tinan 2018 sei iha konta autoridade hamutuk millaun $38.

Transferénsia orsamentu 2019 ba Autoridade, iha faze rua ne’ebé faze dahuluk transfere ona ho montante millaun $38 no ba faze daruak mós ho montante hanesan, maibé depende ba ezekusaun autoridade.

Iha audiénsia konjunta komisaun, Prezidente RAEOA-ZEESM interinu sesante, Arsénio Paixão Bano, admite katak to’o fulan novembru ne’e autoridade seidauk hetan transferénsia orsamentu faze daruak, maibé daudaun ne’e ezekusaun atinji ona porsentu 77,9.

Notísia Relevante: Lugu Sei Reúne ho Autoridade Sesante Kona-ba Orsamentu RAEOA-ZEESM

Deputada Virgínia rekoñese katak, iha projetu ka buat balun iha RAEOA-ZEESM maka tenke kontinua maibé ninia kontinuasaun depende ba autoridade foun atu bele haree.

“Karik Governu bele propoin mós iha diskusaun orsamentu. Ida-ne’e ha’u mós la hatene no laiha informasaun asuntu ne’e, maibé tenke iha lai termu entrega atu hatene loloos katak saldo ne’ebé sei iha ne’e hela osan hira”, nia informa.

Deputada ne’e haktuir, parte Komisaun C nia haree katak Governu Sentrál maka bele foti desizaun se autoridade iha nesessidade atu bele fó tan osan ka husik hela kontinua ho osan ne’ebé iha.

Entretantu, daudaun ne’e Autoridade RAEOA seidauk integra iha sistema Government Resources Planning (GRP) ka Planeamentu Rekursu Governu, ne’ebé Governu Sentrál uza.

Tuir planu autoridade sei integra iha sistema ne’e iha tinan 2020. Atuál iha sistema tau orsamentu RAEOA-ZEESM iha verba transferénsia públika.

Jornalista : Cipriano Colo

Editór: Xisto Freitas

 

HAKEREK NO HATÁN

Please enter your comment!
Please enter your name here