Dekanu Fakuldade Siénsia Sosiál, UNTL Camilo Ximenes.

DILI, 16 novembru 2019 (TATOLI)-Dekanu Fakuldade Siénsia Sosiál (FSS), Camilo Ximenes Almeida hateten, kualidade Ensinu la’os ko’alia no mehi de’it, maibé presiza duni hadi’a kondisaun ne’ebé sufisiente no iha lideransa ne’ebé mak kreativu, inovativu, estimulativu, inspirativu.

“Nu’udar lider, iha estilu lideransa barak ne’ebé banati tuir hodi lalori tan nia rotan hodi manda, maibé oinsá bele sai nu’udar líder ezemplár la’ós manda de’it maibé presiza fó ezemplár hanesan líder sira, hahú husi Nicolau Lobatu, Fransisco Xavier do Amaral, Xanana Gusmão, Eis Gerilerus no EisJeneral F-FDTL no Eis-Prezidente Repúblika, atuál Primeiru-Ministru Taur Matan Ruak no sira hotu dedika ona, sira-nia aan ba rai ida ne’e no hahu inisiu to’o ohin loron, hatudu ona ezemplu barak mai ita,” haklaken dekanu Camilo Ximenes Alves iha kampus FSS, iha serimónia judísiu, Caicoli, sábadu (16/11).

“Tanbá ne’e, ita serbisu hamutuk atu halo kompleta buat ne’ebé menus no ida ne’ebé durante ne’e sei mehi de’it, ita hotu nia kontribuisaun atu realiza iha futuru, milagre sei la akontese bainhira ita rasik sei lá halo esforsu,” konsidera akadémiku UNTL ne´e.

Dekanu FSS ne´e fó hanoin, judísiu atu termina kursu iha nível lisensiatura la´ós dalan ikus nian. “Loron foun ba imi atu asumi responsabilidade no dezafiu foun iha imi-nia vida tomak ne’ebé de’it no ba aman inan sira imi hili fakuldade ida ne’e nu’udar fatin ida hodi kuda imi-nia fini durante tempu naruk maibé, ohin imi bele ku’u nia rezultadu”.

Nune’e nia husu ba estudante judisium sira katak: “Ohin judísiu ida ne’e imi simu responsabilidade ida ne’ebé todan tebes tanba imi ida-idak sei ba iha imi-nia sosiedade hodi serbisu, hodi hatudu imi-nia maturidade nu’udar ema formadu husi universidade no la’ós hanesan ema estudante husi universitáriu ne’ebé foin aprende”.

Iha parte seluk, Dekanu FSS, Camilo Ximenes Alves hateten, FSS iha departamentu ha’at simu ona avaliasaun husi avaliasaun ANAA (Ajénsia Nasionál ba Avaliasaun no Akreditasaun Akadémika, sigla portugés).

“Halo ona avaliasaun programatika no ita hotu he’in rezultadu husi avaliasaun ne’e maibé, iha ona rekomendasaun sira balun fakuldade bele halo maka planu fakuldade ni’an atu fó formasaun kontinua ba profesór sira no funsionáriu sira iha fakuldade siénsia sosiál, hodi nune’e sira bele halo sira-nia funsaun nu’udar dosente no funsionáriu ho di’ak”.

Nia reforsa tan, Iha departamentu balun falta dosente. “Fakuldade halo ona rekrutamentu ba dosente sira liuliu fakuldade iha hanoin atu halo kadernizasaun atu moderniza fali fakuldade liuhusi kadernizasaun ba dosente sira”.

Judísiu FSS nian iha tinan ida ne´e mak ba dala 22. Estudante ne’ebé tuir judísiu hamutuk ema na’in 97. Husi departamentu ne’en hanesan Administrasaun Públika 14, Siénsia Polítíka 20, Dezenvolvimentu Komunitáriu 10, Polítikas Públika 18, Komunikasaun Sosiál 21, Relasaun Internasionál 14.

Entertantu, Serimónia judísiu ne’e partisipa husi Espoza Primeiru-Ministru, Isabel Ferreira, Reprezentante Embaixadór Indonezia iha Timor-Leste, Eis-Magnífiku Reitór Universidade Nasionál Timor-Lorosa’e, Aurélio Guterres, profesór, estudante no inan-aman sira.

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here