Sekretáriu Jerál Partidu CNRT, Francisco Kalbuadi Lay. Imajen dok. Tatoli.

TIBAR, 16 novembru 2019 (TATOLI)–Auzénsia líder másimu Aliansa Mudansa ba Progresu (AMP), Kay Rala Xanana Gusmão iha konferénsia daruak AMP ne’ebé hala’o iha Sentru Formasaun Tibar, Postu Administrativu Bazartete, Munisípiu Liquiçá, ohin, la fó impaktu ba relasaun membru AMP, maibé bloku ne’e kontinua sólidu.

“Iha konferénsia dahuluk mós Kay Rala Xanana Gusmão la marka prezensa, tanba rezolve kestaun Fronteira Marítima. Momentu ida-ne’e mós  nia (Xanana) sei iha hela rai li’ur hamutuk ho Ramos Horta tanba hetan konvite espesiál atu partisipa iha konferénsia internasionál nível Ázia Pasífika iha Kambodia”, Koordenadór Jerál Meza konferénsia AMP, Francisco Kalbuadi Lay hateten lia hirak ne’e liuhusi konferénsia imprensa.

Lee mós: Xanana “Auzente” Iha Konferénsia AMP Iha Tibar

Iha konferénsia Nasionál daruak ne’e aprova afirmasaun pontu ualu liuhusi rezolusaun númeru 2/2019, ne’ebé iha primeiru pontu hateten AMP kontinua tau fiar ba responsável sira AMP nian, liuliu Kay Rala Xanana Gusmão nu’udár Prezidente AMP hodi kontinua lidera AMP, sai nu’udár aliansa ne’ebé forte hodi serbí povu no rai doben Timor-Leste.

Enkuantu, kontinua fó fiar mós ba Taur Matan Ruak hanesan portavós AMP hodi reprezenta AMP, nu’udár Primeiru-Ministru ba Governu Daualuk, hodi hatutan no konkretiza promesa AMP nian ba serbí ho di’ak liután povu Timor-Leste,  no kontinua fó fiar mós ba José dos Santos Naimori Bukar hanesan líder AMP nian ida, ne’ebé durante ne’e tau-matan ba AMP nia lala’ok no Konsellu Diretivu AMP atu koordena no fasilita nafatin komunikasaun entre Parlamentu Nasionál no Governu hodi alkansa objetivu ba povu nia moris di’ak.

“Kada fulan tolu AMP sempre konsolida malu hodi ko’alia kona-ba buat hotu-hotu ne’ebé relasaun ho AMP nia interese”, Kalbuadi deklara.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here