Koordenadór Jerál Meza Konferénsia AMP, Francisco Kalbuadi Lay akompaña husi Vise Koordenadór Fidelis Manuel Leite Magalhães ho Vise Koordenadór, José Agostinho da Silva, hala'o konferénsia imprensa, hafoin konferénsia iha Sentru Formasaun Tibar. Imajen TATOLI/Cipriano Colo

TIBAR, 16 novembru 2019 (TATOLI)—Konferénsia Nasionál daruak Aliansa Mudansa ba Progresu (AMP) liuhusi Rezolusuan nu. 2 /2019, deside ona atu halo remodelasaun ba estrutura Governu Daualuk.

Remodelasaun ne’e ho intensaun atu responde ba nesesidade dezenvolvimentu nasaun, liuliu kontribui ba hadi’a dezempeñu Governu nian.

Nosaun ba remodelasaun ne’e, nu’udar pontu dahituk hosi pontu daualuk ne’ebé AMP sita iha konferénsia ne’ebé hala’o iha Sentru Formasaun Tibar, Postu Administrativu Bazartete, Munisípiu Liquiçá, sábadu ne’e.

Pontu daruak hosi afirmasaun ne’e, AMP kontinua solisita Primeiru-Ministru, Taur Matan Ruak, atu halo komunikasaun ho Prezidente Repúblika hodi asegura tomada pose ba membru Governu indijitadu sira tanba AMP observa katak membru Governu ne’ebé ladauk kompletu lori prejuizu ba implementasaun programa Governu Daualuk, inklui afeta ba planu asaun anuál no ezekusaun orsamentu anuál.

Iha pontu datoluk, AMP kompremitidu atu halo hikas ezersísiu redús montante orsamentu jerál Estadu 2020.

Aleinde ne’e, iha pontu dahaat, AMP solisita Primeiru-Ministru, ho apoiu husi Parlamentu Nasionál, halo esforsu hotu atu asegura pagamentu dívida Governu nian iha área infraestrutura.

Afirmasaun kompletu (pontu 8) ne’ebé AMP deside iha konferénsia refere mak hanesan tuir mai ne’e: 1) AMP kontinua tau fiar ba responsável sira AMP nian, liuliu (a) kontinua fó fiar ba  Xanana Gusmão lidera AMP, sai nu’udar aliansa ne’ebé forte hodi serbí povu no rai doben Timor-Leste, (b) kontinua fó fiar ba Taur Matan Ruak nu’udar portavóz AMP atu reprezenta AMP, nu’udar Primeiru-Ministru ba Governu Daualuk, hodi hatutan no konkretiza promesa AMP nian ba serbí ho di’ak liután povu Timor-Leste, (c) kontinua fó fiar ba José dos Santos Naimori Bukar hanesan líder AMP nian ida, atu tau-matan ba AMP nia lala’ok, (d) kontinua fó kbiit ba Konsellu Diretivu AMP atu koordena no fasilita komunikasaun entre Parlamentu Nasionál no Governu hodi alkansa objetivu ba povu nia moris di’ak.

2) AMP observa katak membru Governu ne’ebé ladauk kompletu kontinua lori prejuizu ba implementasaun programa Governu Daualuk, inklui afeta ba planu asaun anuál no ezekusaun orsamentu anuál. Tanba ne’e, solisita Primeiru-Ministru, Taur Matan Ruak atu: (a) halo nafatin komunikasaun ho Prezidente Repúblika hodi asegura tomada pose ba membru Governu indijitadu sira, (b) husu Prezidente Repúblika justifika formalmente “por escrita” nia pozisaun kona-ba membru polítika sira ne’ebé indijitadu ona no (c) bainhira laiha solusaun ba membru Governu indijitadu sira, AMP sei la halo diálogu ho kualker entidade no personalidade polítika.

3) AMP endosa planu asaun anuál no orsamentu ba tinan 2020, ne’ebé mak aprezenta husi portavóz AMP, nu’udar mós Primeiru-Ministru Governu Daualuk, ho observánsia ba: (a) komentáriu no sujestaun ne’ebé aprezenta obra husi kada responsável Komisaun Parlamentár (Komisaun A to’o G)  ba kada setór no /liña ministerál, inklui nosaun atu halo hikas ezersísiu hodi redús montante orsamentu jerál Estadu 2020, (b) kustamentu ba planu asaun anuál, inklui define meta anuál nian tenke aprezenta duni husi instituisaun Estadu/liña ministeriál sira rasik no (c) asegura kontinuidade no melloramentu sistema planeamentu no orsamentu 2020 ne’ebé orientadu ba rezultadu, iha ne’ebé aliñadu ho programa tinan lima Governu Daualuk, inklui aliñamentu ho liña orientasaun jerál ne’ebé aprezenta no endosa ona iha konferénsia nasionál daualuk AMP nian.

4) AMP solisita Primeiru-Ministru, Taur Matan Ruak, ho apoiu husi Parlamentu Nasionál, halo esforsu hotu, ba asegura pagamentu dívida Governu nian iha área infraestrutura.

5) AMP apoiu desizaun Primeiru-Ministru, Taur Matan Ruak, kona-ba Unidade Planeamentu, Monitorizasaun no Avaliasaun (UPMA)  atu nia nafatin eziste ho alterasaun ba nia kompeténsia mak haree de’it ba planu quinquinal no foku ba avaliasaun ezekusaun programa.

6) AMP rekomenda ba Konsellu Diretivu atu estabelese ekipa ida, ho Konsellu Diretivu nia supervizaun, presta apoiu tékniku iha ámbitu koligasaun AMP nian, inklui halo aperfeisoamentu ba proposta projetu Lei Orsamentu Jerál Estadu 2020.

7) AMP konsidera nosaun atu halo remodelasaun ba Governu Daualuk hodi responde ba nesesidade dezenvolvimentu nasaun nian, liuliu kontribui ba hadi’a dezempeñu Governu nian.

8.Rezolusaun ne’ebé aprovadu iha konferénsia daruak AMP ne’e, aplika ho karáter vinkulativu. Rezolusaun ida-ne’e hahú vigora iha loron ne’ebé hetan ona aprovasaun iha konferénsia daruak AMP ne’e.

Konferénsia nasionál AMP daruak nian iha 16  novembru, ninia kompozisaun meza konferénsia mak, Koordenadór Jerál, Francisco Kalbuadi Lay, Vise Koordenadór, Fidelis Manuel Leite Magalhães no Vise Koordenadór, José Agostinho da Silva.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here