familia ho colega sira inklui komunidade balun iha Metinaro ba haree matebian Pedro Onio Conceição nia mate isin ne'ebe falun hela atu transporta mai HNGV, sesta (15/11/2019). Imajen/Foti Hosi Facebook

DILI, 15 novembru 2019 (TATOLI)-Asidente tráfegu ne’ebé akontese, ohin, tuku 06:00 Otl, iha área Metinaro Dili, rezulta Pedro Onio Conceição, nu’udar  Lautem-oan mate fatin.

Matebian Pedro Onio Conceição, sai hosi nia hela fatin iha Dili ho motor Beat mutin xapa matrikula N.9341 atu ba servisu iha Matinaro. Tuir dalan, vítima halai ho velosidade derrepente karau teri netik, nune’e matebian trava la hetan hodi soke karau no monu ba soke tutan tan karreta baskulante ida ho xapa matrikula 60708 Tls.

“Vítima soke uluk karau maka monu soke tan karreta hodi rezulta vítima mate iha fatin, tanba informasaun mós katak vítima la uza kapasete,” informa Segundu Komandante Polisia Munisípiu Dili, Superintendente Asistente Polisia, Euclides Belo ba jornalista iha Komandu PNTL Caicoli, Dili.

Matebian Pedro moris iha Lautem iha loron 1996 nu’udar traballadór hosi kompañia nasionál ida ne’ebé toma konta te’in hahán oferese ba membru FALINTIL-Forsa Defeza Timor-Leste (F-FDTL) iha Kuartél Metinaro, Dili.

Mate isin transporta kedas mai Ospitál Nasionál Guido Valadares (HNGV) hodi halo autópsia depois sei lori ba matebian nian hela fatin.

Parte Polisia Tránzitu, Postu Administrativu Metinaro ho sasin inklui vítima nia família no kolega sukat kedas fatin akontesimentu hodi submete ba prosesu investigasaun.

Parte seluk, karreta no vítima nia motór rasik parte polisia lori ona ba Komandu PNTL Caicoli Dili hodi hein prosesu investigasaun kle’an.

Komandu PNTL mós alerta ba públiku sira bainhira atu hala’o viajen ba munisípiu sira tenke uza kapasete no halai neineik, tanba agora daudauk kuaze estrada nasionál iha Timor-Leste sei hadi’a hotu bele afeta ba asidente tanba rai no fatuk barak butuk iha estrada laran.

Jornalista : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here