Sekretáriu Estadu Komunikasaun Sosiál,Merício Juvinal dos Reis ‘Akara’, asina akordu ho Xefi Suku Batu Mano, Fernando Soares, iha salaun SEKOMS. Imajen Tatoli/António Gonçalves

DILI, 16 novembru 2019 (TATOLI) – Governu liuhosi Sekretaria Estadu Komunikasaun Sosiál (SEKOMS) asina akordu ho autoridade Suku Batu Mano, Postu Administrativu Atsabe, Munísipiu Ermera, hodi aloka osan hamutuk $10.000, hodi bele kria Sentru Informasaun iha suku refere.

“Ohin ita asina akordu ida ho Xefi Suku Batu Mano kona-ba proposta ida hodi dezenvolve Sentru Informasaun”, dehan Sekretáriu Estadu Komunikasaun Sosiál, Merício Juvinal dos Reis ‘Akara’ iha Palásiu Governu, sesta ne’e.

Governante ne’e esplika, akordu ne’ebé Governu halo ho Suku Batu Mano hanesan programa kontinuasaun ‘Naroman ba Suku’, ne’ebé iha fulan hirak liubá lansa ona iha Suku Rotuto, Postu Administrativu Same, Munisípiu Manufahi no Suku Liurai, Postu Administrativu Aileu, Munisípiu Aileu.

Sekretáriu Estadu Komunikasaun Sosiál,Merício Juvinal dos Reis ‘Akara’, kaer liman ho Xefi Suku Batu Mano, Fernando Soares, hafoin asina akordu Fundu Tranferénsia Públika iha salaun SEKOMS. Imajen Tatoli/António Gonçalves

“Programa Naroman ba Suku ne’e ita lansa ona iha Suku tolu. Diálogu komunitáriu no sinema movél mós ita hala’o ona iha ne’ebá. Agora komunidade maka iha inisiativa atu promove informasaun entaun ita fó apoiu ba komunidade iha Sentru Informasaun maka sira bele dezenvolve informasaun iha nível suku,” tenik Akara.

Nia subliña, ba oin kada fulan tolu Governu sei promove nafatin diálogu entre komunidade ho Governu atu komunidade bele akompaña nafatin atividade Governativa nian.

“Ekipa SEKOMS liuliu iha departementu audiovizuál sei apoiu nafatin komunidade sira-ne’e, nune’e bele promove poténsia turístiku, fatin ístoriku sira, poténsia ekonomia no kulturál atu ita bele tau hanesan perfíl suku, hodi suku ne’e bele lori mai intrega ba mídia nasionál sira no suku  seluk bele akompaña saida mak akontese iha suku seluk sira,” nia akresenta.

Entretantu, programa Naroman ba Suku hanesan programa importante Governu nian ne’ebé bolu Governu iha povu nia le’et atu bele fasilita informasaun di’ak liu ba komunidade sira.

Iha fatin hanesan, Xefi Suku Batu Mano, Fernando Soares, espresa ninia sentimentu haksolok ho inisiativa Governu nian ne’ebé apoiu ona Suku Batu Mano, liuliu iha informasaun ne’ebé atu lori komunidade sira bele asesu di’ak ba informasaun.

“Sente orgullu no agradese ba Governu tanba bele apoiu ona ha’u nia suku hodi kria Sentru Informasaun. Ho apoiu ida-ne’e ha’u nia povu sira mós sente duni ukun rasik-aan ida-ne’e”, dehan Fernando.

Nia hatutan, durante ne’e populasaun barak maka ladún asesu di’ak ba informasaun liuliu serbisu Governu nian, maibé ho ajudu ne’ebé SEKOMS apoiu ona bele fasilita komunidade sira hodi bele asesu informasaun ho di’ak.

Jornalista: Hortençio Sanchez

Editór: Xisto Freitas                                              

 

HAKEREK NO HATÁN

Please enter your comment!
Please enter your name here