Xefe Suku Assumanu, Bernardino Martins. Imajen/Tatoli Egas Cristovao

LIQUIÇÁ, 15 novembru 2019 (TATOLI) — Xefe Suku Assumanu, Postu Administrativu Liquiçá Vila, Munisípiu Liquiçá, Bernardino Martins,  propoin ba Governu atu rekupera vítima inséndiu sira-nia hela fatin tanba oras ne’e udan besik atu monu rai.

Inséndiu ne’ebé akontese iha 2 outubru iha suku Assumanu, aldeia tolu mak afetadu mak hanesan Kaikasaiko, Siskoelema, Kirilelo. Hosi aldeia tolu ne’e rezulta komunidade nia uma 20 mak ahi-han iha suku refere no 36 mak hetan sobu hosi anin.

Xefe Suku ne’e realsa, vítima inséndiu iha suku Assumanu foin hetan apoia emerjénsia, agora vítima sira-nia dokumentu atu hetan atendimentu atu rekupera fali sira-nia hela-fatin ne’e seidauk.

“Ita espera dezembru ne’e sira bele rekupera ona vítima sira tanba agora udan atu mai daudaun no presiza duni atendimentu urjénsia hosi Estadu. Estadu labele hein de’it maibé presiza preokupa katak ita-nia komunidade presiza ita-nia atendimentu urjente”, Xefe Suku Assumanu ne’e informa ba Ajénsia TATOLI iha Administrasaun Munisipál Liquiça, ohin.

Xefe Suku ne’e subliña, inséndiu ne’e ema dehan kauza dezastre naturál ne’ebé dalaruma mós la espera, tanba la deskobre kauza loloos hosi akontesimentu ahi han ne’e.

Nia dehan, talvés komunidade sira mós sunu-rai, maibé atu hatete katak akontesimentu insénsiu ida iha 2 outubru ne’e ninia velosidade aas tebes, komunidade tenta posivel atu hamate ahi ne’e maibé labele tanba maka’as..

“Rai-lolon ne’e kuandu mosu inséndiu, ahi ne’e semo, rai tetuk nia han ne’e neinek, agora situasaun ne’e ahi kuaze semo liu tiha ai-tutun sira ne’e, defisil tebes ba ita atu hamate ahi ne’e”, haktuir Xefe Suku Assumanu.

Iha akontesimentu ne’e la rezulta ema ruma kanek no mate iha suku Assumanu, maibé sasán mak kuaze la salva.

“La’ós uma no sasán de’it, kuaze plantasaun lubuk ida, ektare 50 hanesan ne’e mak ahi-han hotu, hanesan kafé, ai-farina, hudi, buat hotu-hotu iha kintál laran ahi-han”.

Ho vítima inséndiu ne’ebé númeru aumenta maka’as, Primeiru-Ministru, Taur Matan Ruak, fó orientasaun liuhosi ekipa Gabinete Primeiru-Ministru nian halo fali verifikasaun foun.

“Akontesimentu sira ne’e naturál, agora, tuir informasaun verbál no informasaun sira ne’ebé mak espalladu katak, ahi-han ne’e mosu hosi mota-laran (baliza entre Ermera ho Liquiçá), agora autór ne’e mak ita lahatene”, dehan Xefe Suku Assumanu.

Maibé, akontesimentu ne’e halo ema hotu dúvida tanba mosu iha loromonu, rai-klaran no lorosa’e, entaun konsidera inséndiu ne’e naturál.

Nia dehan, inséndiu ne’e bele mai hosi ema fuma no soe sigarru, bele tanba ema tunu han hela buat ruma iha ai-laran mak depois afeta.

“Ne’ebé ita atu identifika loloos sé mak autór no hosi ne’ebé ne’e defísil “, hateten Xefe Suku Assumanu, Bernardino Martins.

Assumanu iha totál populasaun hamutuk 2654 kompostu hosi mane 1300-resin no feto mós hanesan. Suku Assumanu iha xefe-família 542, maioria agrikultór.

Notísia relevante : Governu Responde Ona Vítima Dezastre Naturál 312 Iha Liquiçá

Jornalista : Evaristo Soares Martins
Editora : Maria Auxiliadora

HAKEREK NO HATÁN

Please enter your comment!
Please enter your name here