Motór kuaze 1.000 ne’ebé para iha Komandu Polisia Munisípiu Dili iha tempu besik sei halo leilaun ba públiku. Imajen/Eugénio Pereira

DILI, 15 novembru 2019 (TATOLI)-Segundu Komandante Polisia Munisípiu Dili, Superintendente Asistente Polisia, Euclides Belo,  informa, polisia  submete ona lista motorizada 400-resin no karreta  ba Ministériu Públiku  hodi aprova atu halo leilaun ba públiku.

Notísia Relevante: Tribunál Aprova Pedidu Leilaun Ba Transporte Abandonadu

Nia dehan, molok ne’e, Komandu Dili  ho  Prokuradór Distritál Dili, Jacinto Babo, halo ona koordenasaun dala haat hodi haree evidénsia hosi transporte privadu hirak ne’ebé prende hahú hosi  2000 to’o 2019 tanba ninia prosesu remata ona iha tribunál.

“Ba motór de’it kuaze 400-resin inklui mós karreta númeru la serteza  tanba  sasán evidénsia sira ne’ebé ninia prosesu kazu hotu ona, se na’in la mai foti bele loke prosesu leilaun ba públiku,” relata Euclides Belo ba Jornalista, ohin, iha Caicoli, Dili.

Karreta-Motór PNTL Liu Ona Tinan Lima Bele Leilaun

Komandu Polisia mós halo ona koordenasaun ho Diresaun Nasionál Transporte  no Terrestre (DNTT) atu rejistu hikas transporte hirak ne’e hodi hetan STNK foun.

Motorizada no karreta barak maka durante ne’e para iha komandu PNTL Dili hodi okupa espasu lubuk ida tanba ne’e tempu ona atu halo leilaun ba públiku.

Kona-ba motorizada sira ne’ebé maka kondisaun aat no laiha xapa matrikula atu halo leilaun, PNTL sei halo destruisaun hosi Ministériu Públiku  ka fa’an ba kompañia besi tua.

Tuir observasaun TATOLI iha Komandu PNTL Munisípiu Dili nota kuaze motorizada rihun ida-resin maka estasiona iha ne’ebá. Hosi hirak ne’e balun sei iha kondisaun di’ak no balun aat ona.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here