Koordenadór Gabinete Jurídiku MEJD, Hermenegildo Magno Gomes. Foto TATOLI: Tomé Amado

OE-CUSE, 15 novembru 2019 (TATOLI)-Koordenadór Gabinete Apoiu Jurídiku (GAJ), Ministeriu Edukasaun, Juventude no Desportu (MEJD), Hermenegildo Gomes hateten katak sei iha alterasaun ba dekretu lei tolu hanesan dekretu lei númeru 7/2010, dekretu lei númeru 23/10 no mós dekretu lei númeru 33/2011 tanba iha lakunas balun no la kondis ona ho realidade.

Maske nune´e, molok atu halo alterasaun parte GAJ disemina uluk dekretu lei tolu ne’e ba dirijente kargu xefia sira iha kada eskola atu rona sira-nia preokupasaun no realidade problema barak akontese duni. Tanba ne´e, GAJ deside ona atu halo alterasaun iha 2020 maibé agora sei relata ba Ministra Edukasaun hodi aprezenta ba Konsellu Ministru.

“Ami iha ona materia, ami mós iha ona esbosu atu apreznta ba Ministra Edukasaun hodi lori ba Konsellu Ministru tanba planu anual Gabinete Apoiu Jurídiku nian ba 2019 prioridade mak tenke altera lei tolu ne’e,”, Hermenegildo Gomes koalia ba jornalista sira iha salaun enkontru Ministėrio Edukasaun RAEOA-Rejiaun Administrativu Espesiál Oecuse-Ambeno) Santa Rosa, sesta (15/11/2019).

Tuir nia, planu sira ne’e tama ona iha konsiderasaun GAJ nian maibé depende ba autoridade relevante sira nian oinsá atu entende ho lei tolu ne’e. “Atu dehan de’it 2011 to’o ohin loron lei (dekretu) sira ne’e konsidera la relevante ona ho kondisaun reál ne’ebė iha”.

Koordenadór, Hermenegildo Gomes informa, lakunas barak ne’ebė akontese iha dekretu lei 23 kona ba estatutu dosente nian iha rejime espesiál kuandu halo komparasaun  ho profisionál saúde ida uainhira hahú ninia karreira ho nível edukasaun grau baxarelatu hetan saláriu 400 dolár itál kompara ho dosente grau baxarlatu hetan de’it saláriu 298 dolár. Ne’e diferensia bo’ot.

“Ita-nia lider barak iha nasaun ne’e ko´alia kona-ba kualidade edukasaun maibé halo fali diskriminasaun saláriu ba ema ho grau edukasaun  hanesan”.

“Agora kona-ba dekretu lei númeru 7 mosu mós lakuna mak mandatu ba kargu xefia ne’e loloos to’o de’it mandatu dala rua maibé diretór barak mak sira-nia mandatu ne’e ba dala haat ona loloos viola ona lei no bele prosesa ba tribunál. Tanba ne’e mak atu haree didi´ak esbosu alterasaun ne’e, 2020 mak sei aselera,” nia esplika.

Notísia relevante:Hakbesik Ba GAJ Bainhira La Entende Dekretu Lei Tolu

Jornalista : Tomė Amado

Editór       : Rafy Belo

HAKEREK NO HATÁN

Please enter your comment!
Please enter your name here