Mark-D.-Clark. Imajen: https://www.state.gov/biographies/mark-d-clark/

DILI,15 Novembru 2019 (TATOLI)- Diretór Gabinete Asuntu Marítima Sudeste Aziátiku iha Eskritóriu Ázia Leste no Pasífiku, Ministériu Negósiu Estranjeiru EUA (Estadu Unidu Amérika), Mark D.Clark,  ohin hasoru malu ho Primeiru-Ministru (PM) Taur Matan Ruak  atu énfaze parseria metin liután entre EUA ho Timor-Leste (TL) no rona idea hosi  xefe governu nian kona-ba oinsá hametin parseria ne’ebé iha ona entre Timor-Leste no Nasaun Unida.

“Iha ami-nia diskusaun ko´alia kona -ba asuntu oioin maibé nia objetivu maka ko´alia liu ba parseria hodi hametin nasaun rua ne’e tanba ne’e ami troka idea  no énfaze liu ba valoriza relasaun lasu entre povu ho povu, hametin kooperasaun iha área oioin hanesan iha seguransa, ekonomia no polítika,” Diretór Mark informa ba jornalista sira iha Palásiu Governu, ohin.

Nia mós hatutan katak relasiona ho diskusaun sira ne’e, sira mós foka liu ba iha estratejia ne’ebé sira halo iha Indo-pasífiku,

“Entaun iha ne’ebá  ami mós ko´alia atu oinsá bele hametin liután oportunidade ba joven sira liuhosi relasaun atu hametin lasu entre ema ho ema no povu ho povu entre rai rua ne’e. Ezemplu liuhosi Programa Fullbright, Wisely, no programa seluk tan ne’ebé envolve joven timoroan lubuk ida maka ohin loron bele kontribui ona ba dezenvolvimentu nasaun, ida ne’e hanesan parte kooperasaun ida ba iha dezenvolvimentu kapitál umanu,” Mark haktuir.

Iha biban ne’e, Mark Clark mós rekoñese TL nia polítika nu´udar nasaun demokrátiku ida ne’ebé bele ajuda rezolve fronteira marítima no fronteira terrestre ho di’ak.

“Buat ida ne’ebé ami rekoñese no apresia tebes maka oinsá Timor-Leste hanesan  nasaun  soberania no demokrátiku bele rezolve nia fronteira maritíma no fronteira terrestre tuir regra lei nian, tuir lei internasionál nian no ida ne’e nu´udar ezemplu boot  ida ba Sudeste Aziátiku ba rejiaun hotu no mós ba mundu. Ida ne’e maka buat ida ami apresia liu iha Timor-Leste.” Diretór Gabinete Asuntu Marítima Sudeste Aziátiku iha Eskritóriu Azia Leste no Pasífiku EUA ne´e rekoñese.

Diretór amerikanu ne´e mós perante profisionál komunikasaun sosiál sira kompromete katak ba oin parseiru, entre EUA no TL sei sai di’ak liután no forte liután.

Jornalista: Nelia Borges

Editór     : Rafy Belo

HAKEREK NO HATÁN

Please enter your comment!
Please enter your name here