Ministru Transporte no Komunikasaun, José Agustinho da Silva. Imajen Tatoli/Egas Cristóvão

DILI, 15 novembru 2019 (TATOLI) – Prezidente Autoridade Aviasaun Sivíl Timor-Leste (AACTL, sigla portugés), Ana Rosália Ximenes Varela, informa durante loron tolu nia laran, hahú iha 11 to’o 13 novembru, empreza Sriwijaya kansela nia operasaun tanba aviaun iha hela manutensaun. Nune’e iha 14 novembru ne’e mak halo fali nia atividade hanesan normál.

“Empreza la hapara operasaun maibé kansela operasaun tanba aviaun sei hadi’a hela durante loron tolu hafoin halo operasaun normál”, esplika nia ba Ajénsia Tatoli via-telefónika, ohin.

Tuir nia, operasaun aviaun Sriwijaya la’o normál hikas, kuandu atu hapara nia atividade tan pasajeiru, entaun empreza tenke fó hatene mai AACTL.

Sriwijaya hola parte iha kategória designate fight no sira nian flight approval ka lisensa semo ne’ebé husi AACTL atribui to’o 31 dezembru agora.

Nune’e mós, Ministru Transpote no Komunikasaun, José Agostinho da Silva, fundamenta katak notísia ne’e maka deputadu sira iha Parlamentu ko’alia maibé la’ós hapara operasaun, más hapara provizóriu tanba manutensaun.

“Horseik, reprezentante empreza Sriwijaya mai hasoru ha’u, sira rejeita informasaun sira ne’e katak informsaun ne’e la loos, ami-nia opersaun normál nafatin, fó atendimentu ba ita-nia pasajeiru sira tantu husi Timor-Leste bá rai-liur, husi Indonézia mai fali Timor-Leste”, dehan nia ba jornalista sira hafoin partisipa reuniaun ordinária CAFI iha Ministériu Finansa, Aitarak-Laran.

Depois manutensaun ne’e, aviaun Sriwijaya daudaun halo nia atividade hanesan normál.

Jornalista : Natalino Costa 

Editora : Maria Auxiliadora                                                    

HAKEREK NO HATÁN

Please enter your comment!
Please enter your name here