Xefe Projetu Eleitorál UNDP, Tito de Jesus Filipe da Costa

DILI, 15 novembru 2019 (TATOLI)- Xefe Projetu Eleitorál, Programa Nasaun Unida ba Dezenvolvimentu (UNDP-sigla Inglés), Tito de Jesus Filipe da Costa, konsidera, formasaun ba Jornalista Timor-oan importante hodi eleva abilidade no koñesimentu   hodi fó apoiu ba  servisu lor-loron.

Eis Jornalista Rádiu Televizaun Timor Leste, empreza públika (RTTL,ep) Tito Filipe hateten lia hirak  ne’e, ohin, bainhira ensera formasaun multimedia ba jornalista Ajénsia TATOLI na’in sia iha otél Ramelau, Dili.

“Inísiu  ita iha diskusaun ida entre UNDP ho TATOLI katak atu fó formasaun kontinuidade ba mídia sira hotu, maibé faze ida ne’e ba jornalista TATOLI.IP,” esplika Tito Filipe.

Nia dehan tan, TATOLI.IP hanesan mídia eletróniku ida tanba ne’e presiza iha kapasitasaun másimu ba ninia Jornalista sira. Nune’e, ba futuru sei iha tan formasaun no kapasitasaun integradu no komprensivu ba Jornalista Mídia hotu iha área multimedia.

Iha tinan 2018, PNUD fó ona kapasitasaun ba  funsionáriu hosi Sekretariadu  Tékniku Administrasaun Eleitorál (STAE) no Komisaun Nasional Eleisaun (CNE) no mós instituisaun mídia sira seluk.

Iha biban hanesan, Prezidente TATOLI.IP, José da Costa  hatete formasaun ne’e sei tulun instituisaun públiku atu públika ninia informasaun sira iha portal TATOLI ho di’ak liután iha 2020.

“Ami-nia planu ba tinan oin sei públika vídeo, audio iha portál TATOLI,” informa Prezidente TATOLI.IP, José da Costa.

TATOLI.IP sei kontinua koopera ho PNUD atu implementa ninia programa sira liuliu formasaun ba jornalista sira hodi eleva di’ak liután abilidade no koñesimentu iha área jornalizmu.

PNUD termina ona ninia formasaun ba Jornalista na’in-sia hosi Ajénsia TATOLI.IP iha área multimedia ne’ebé hala’o ona durante loron haat, hahú hosi loron 11 to’o loron 15 novembru 2019.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here