Simão Fernandes Mendonça Hornay, vitima ne'ebeé ema deskoñesidu sona iha area Raikotu. Imajen/Foti hosi Facebook

DILI, 15 novembru 2019 (TATOLI)-Simão Fernandes Mendonça Hornay, tenke hala’o tratamentu intensivu iha Ospitál Nasionál Guido Valadares (HNGV-sigla portugés) tanba hetan sona ko’ak rua iha kotuk laran hosi ema deskoñesidu na’in rua, kinta (14/11/2019), tuku 19:00 Otl, iha area Raikotu, Comoro, Dili.

Simão Fernandes Mendonça Hornay, hamriik hela iha estrada ninin estasaun Kombustivel Raikotu, derrepente de’it ema deskoñesidu nain rua ne’ebé kondús motor mio beet (la tau númeru matrikula) halai besik nia hodi sona kedas ho tudik iha nia kotuk laran.

Notísia Relevante : Estudante ESG Nobel da Paz Ida Hetan Agresaun Fízika Husi Ema Deskoñesidu

Informasaun preliminaria hosi Polisia Eskuadra Comoro, Dili,  katak,  kazu ne’e akontese bainhira vítima hamriik hela iha estrada ninin, maibé  derrepente de’it ema deskoñesidu na’in rua ho motor sona vítima hosi kotuk.

“Ita nia alin Estudante Simão Fernandes sai vítima tanba suspeitu sira ho motór lori sasán kro’at sona kanek vítima depois halai liu,” hateten Segundo Komandante Polisia Munisípiu Dili, Superintendente Asistente Polisia, Euclides Belo, ohin, ba Jornalista sira iha Caicoli, Dili.

Euclides Belo dehan, Komandu Eskuadra Comoro daudaun ne’e koordena ona ho Autoridade Suku inklui membru Konsellu Polisiamentu Komunitária (KPK) Comoro hodi buka tuir autór na’in rua ne’e.

Nia hatete, problema ida maka vítima la-konsege akapta xapa matrikula suspeitu sira-nian hodi fó tulun ba  polisia atu deskobre lalais autór sira nia paradeiru.

“Ami lansa ona servisu informasaun hodi buka tuir paradeiru suspeitu ne’e,” hateten Segundu Komandante Polisia Munisípiu Dili ne’e.

Atu evita hodi mosu tan kazu foun mak Komandu PNTL kontinua hala’o patrulla iha tempu kalan hodi prevene númeru kazu konflitu iha Kapitál Dili.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here